Ich Chuenrat Smuchenphennich purger datz Hæunburch chlostershalben vergich offenleich an disem
prief daz ich mit woluerdachtem mut vnd mit gůtleichem willen aller meiner erben meinen wein
garten an der Ehel leiten anderthalb des wægs der mein vreyz purchrecht gewesen ist tæw
chleichen geopfert vnd auf gegeben han mit sampt meinem sun Reinharten dem goteshauz
vnserr vrown vnd der samnung datz Pæumgartenperg durch got vnd auch aller vnserr
vodern sel willen mit rehter fuerzicht also beschaidenleich daz der selb weingart dem
vngenanten goteshauz vnuerprochenleich vnd ewichleichen beleiben schol mit alle dem recht
als ich in vnd mein erben einher pracht haben. Dar vber gib ich disen prief zü
einer rechten warhait vnd zu einem gezeug versigelten mit hern Gotsans jnsigel
der zeden zeiten stat richter was. wand ich selben nicht aigns jnsigels han. Daz
ist geschehen do von Christes gepurd ergangen waren drew zehen hundert iar
dar nach in dem ainundreizzigisten iar an vnserr vrown tag ze der liechten mess.