In nomine domini amen Noverint universi et singuli presens publicum instrumentum inspecturi quod anno a nativitate eiusdem millesimo trecentesimo nonagesimo indiccione tercia decima die lune duodecima mensis Iunii pontificatus sanctissimi in Christo patris et domini nostri domini Bonifacii divina providencia pape noni anno primo In mei notarii publici et testium subscriptorum presencia coram reverendissimo in Christo patre et domino domino Wenceslao episcopo Wratislaviensi constitutus providus vir Mathias Petri de Nachod clericus Pragensis diocesis habens et tenens in suis manibus quasdam litteras apostolicas sanctissimi in Christo patris et domini nostri domini Bonifacii divina providencia pape noni vera bulla plumbea cum filis canapeis more Romane curie impendenti bullatas integras et illesas non viciatas non cancellatas nec in aliqua sui parte suspectas sed prorsus omni vicio et suspicione carentes sanas et integras ut prima facie apparebat quarum tenor de verbo ad verbum sequitur et est talis Bonifacius episcopus servus servorum dei dilecto filio preposito ecclesie sancti Iohannis Wratislaviensis salutem et apostolicam benediccionem Vite ac morum honestas aliaque laudabilia probitatis et virtutum merita super quibus dilectus filius Mathias Petri de Nachod clericus Pragensis diocesis apud nos fidedigno commendatur testimonio nos inducunt ut sibi reddamur ad graciam liberales Volentes itaque eidem Mathie premissorum meritorum suorum intuitu graciam facere specialem providendum sibi de canonicatu ecclesie sancti Petri in Budissin Misnensis diocesis cum plenitudine iuris canonici apostolica auctoritate decernimus et eidem de illo providemus prebendam vero si qua in dicta ecclesia vacat ad presens vel cum vacaverit quam ipse per se vel procuratorem suum ad hoc legitime constitutum infra unius mensis spacium postquam sibi vel eidem procuratori de illius vacacione constiterit duxerit acceptandam conferendam sibi post acceptacionem huiusmodi cum plenitudine iuris canonici reservamus districtius inhibentes venerabili fratri nostro episcopo et dilectis filiis decano et capitulo dicte ecclesie ac illi vel illis ad quem vel ad quos in eadem ecclesia prebendarum collacio provisio presentacio seu quevis alia disposicio pertinet communiter vel divisim ne de dicta prebenda interim eciam ante acceptacionem huiusmodi disponere presumant ac decernentes exnunc irritum et inane si secus super hiis a quoquam quavis auctoritate scienter vel ignoranter contigerit attemptari Non obstantibus de certo canonicorum numero et quibuslibet aliis statutis et consuetudinibus dicte ecclesie contrariis iuramento confirmacione apostolica vel quacumque firmitate alia roboratis aut si aliqui apostolica vel alia quavis auctoritate in eadem ecclesia in canonicos sint recepti vel ut recipiantur insistant seu si super provisionibus sibi faciendis de canonicatibus et prebendis in dicta ecclesia speciales vel aliis beneficiis ecclesiasticis in illis partibus generales dicte sedis vel legatorum eius litteras impetrarint eciam si per eas ad inhibicionem reservacionem et decretum vel alias quomodolibet sit processum quibus omnibus preterquam auctoritate nostra in ecclesia ipsa receptis vel prebendas expectantibus in eadem in assecucione dicte prebende volumus ipsum Mathiam anteferri sed nullum per hoc eis quoad assecucionem prebendarum aut beneficiorum aliorum preiudicium generari seu si episcopo decano et capitulo predictis vel quibusvis aliis communiter vel divisim a dicta sit sede indultum quod ad recepcionem vel provisionem alicuius minime teneantur et ad id compelli aut quod interdici suspendi vel excommunicari non possint quodque de canonicatibus et prebendis dicte ecclesie vel aliis beneficiis ecclesiasticis ad eorum collacionem provisionem presentacionem seu quamvis aliam disposicionem coniunctim vel separatim spectantibus nulli valeat provideri per litteras apostolicas non facientes plenam et expressam ac de verbo ad verbum de indulto huiusmodi mencionem et qualibet alia dicte sedis indulgencia generali vel speciali cuiuscumque tenoris existat per quam presentibus non expressam vel totaliter non insertam effectus huiusmodi gracie impediri valeat quomodolibet vel differri et de qua cuiusque toto tenore habenda sit in nostris litteris mencio specialis aut si presens non fuerit ad prestandum de observandis statutis et consuetudinibus dicte ecclesie solitum iuramentum dummodo in absencia sua per procuratorem idoneum et cum ad ecclesiam ipsam accesserit corporaliter illud prestet Quocirca discrecioni tue per apostolica scripta mandamus quatinus per te vel alium seu alios eundem Mathiam vel procuratorem suum eius nomine exnunc in dicta ecclesia recipias auctoritate nostra in canonicum et in fratrem stallo sibi in choro et loco in capitulo dicte ecclesie cum plenitudine iuris canonici assignatis prebendam vero reservatam huiusmodi si tempore acceptacionis huiusmodi vacabat vel postea vacavit aut cum vacaverit eidem Mathie vel procuratori suo pro eo post acceptacionem huiusmodi cum omnibus iuribus et pertinenciis suis eadem auctoritate conferas et assignes inducentesque ipsum vel dictum procuratorem pro eo in corporalem possessionem canonicatus et prebende iuriumque et pertinenciarum predictorum et defendas inductum ac facias eundem Mathiam vel dictum procuratorem pro eo ad prebendam huiusmodi ut est moris admitti sibique de ipsorum canonicatus et prebende fructibus redditibus proventibus iuribus et obvencionibus universis integre responderi Non obstantibus omnibus supradictis seu si episcopo decano et capitulo predictis vel quibusvis aliis communiter vel divisim a dicta sede indultum existat quod interdici suspendi vel excommunicari non possint per litteras apostolicas non facientes plenam et expressam ac de verbo ad verbum de indulto huiusmodi mencionem Contradictores auctoritate nostra per censuram ecclesiasticam appellacione postposita compescendo Datum Rome apud sanctum Petrum secundo nonas Novembris pontificatus nostri anno primo Post quarum quidem litterarum apostolicarum presentacionem et recepcionem sic ut premittitur factas prefatus Mathias clericus principalis a prefato reverendissimo in Christo patre et domino domino Wenceslao episcopo Wratislaviensi executore in dictis litteris apostolicis principaliter deputato cum instancia debita postulavit quatinus ad execucionem dictarum litterarum apostolicarum et contentorum in eisdem procedere dignaretur Ipse vero dominus Wenceslaus episcopus et executor predictus volens mandatis apostolicis in hac parte reverenter obedire ut tenetur ad execucionem dictarum litterarum apostolicarum et contentorum in eisdem in omnibus et per omnia iuxta traditam sibi formam in eisdem processit et procedere decrevit Super quibus omnibus et singulis premissis prefatus Mathias clericus principalis peciit a me notario publico infrascripto sibi fieri unum vel plura publicum seu publica instrumentum vel instrumenta Acta sunt hec Wratislavie in domo habitacionis prefati domini Wenceslai episcopi et executoris predicti sub anno indiccione die mense pontificatu et loco quibus supra presentibus honorabilibus et discretis viris dominis Iohanne de Cunczendorf canonico Wratislaviensi et Iohanne de Glogovia maiori clerico Wratislaviensis diocesis testibus ad premissa vocatis specialiter et rogatis
Et ego Petrus quondam Iohannis de magna Glogovia clericus Wratislaviensis diocesis publicus imperiali auctoritate notarius quia premissis omnibus et singulis dum sic ut premittitur agerentur et fierent una cum prenominatis testibus presens interfui eaque sic fieri vidi et audivi ideo hoc presens publicum instrumentum manu mea propria scriptum exinde confeci et in hanc publicam formam redegi signoque et nomine meis solitis et consuetis signavi in fidem et testimonium omnium premissorum rogatus et requisitus