Pius Episcopus, Servus Servorum Dei,
dilecto Filio Carolo Skoupy, ab Intimo Nostro Cubiculo, dioecesis Brunensis Seminarii Maioris Rectori, in eiusdem dioecesis Episcopum
electo, salutem et apostolicam benedictionem. Commissum humilitati Nostrae ab aeterno Pastorum Principe supremi apostolatus officium, quo uni-
verso christiano orbi praesidemus, onus Nobis imponit diligentissime curandi ut Ecclesiis omnibus tales praeficiantur Antistites, qui sibi creditum dominicum
gregem salubriter pascere, regere et gubernare sciant ac valeant. Cum itaque cathedralis Ecclesia Brunensis, metropolitanae Ecclesiae Olomucensi suffraganea,
per b. m. Joseph Kupka Episcopi obitum suo sit in praesenti destituta Pastore, Nos, de venerabilium Fratrum Nostrorum S. R. E. Cardinalium consilio
Te ad eam apostolica auctoritate eligimus eique Episcopum praeficimus et Pastorem; nec non eiusdem Ecclesiae curam, regimen et administrationem tum
in spiritualibus tum in temporalibus Tibi plenarie committimus una cum omnibus iuribus et privilegiis, oneribus et obligationibus pastorali huic officio
inhaerentibus. Volumus vero ut, ceteris quoque impletis de iure servandis, antequam episcopalem consecrationem recipias et dioecesis Tibi creditae canoni-
cam capias possessionem, in manibus alicuius quem malueris catholici Antistitis, gratiam et communionem Sedis Apostolicae habentis, fidei catho-
licae professionem et praescripta iuramenta iuxta statutas formulas emittere harumque exemplaria, Tui dictique Antistitis subscriptione ac sigillo
munita, ad Sacram Congregationem Consistorialem quantocius transmittere omnino tenearis. Tuae insuper maiori commoditati prospicientes, Ti-
bi indulgemus ut extra Urbem libere et licite Episcopus consecrari queas a quolibet catholico Antistite, assistentibus ei duobus aliis catholicis Episcopis,
dummodo gratiam ipsi habeant et communionem cum Apostolica Sede. Venerabili itaque Fratri, quem ad hoc Tu elegeris, episcopalem consecrationem
Tibi impertiendi munus ac mandatum per easdem praesentes Litteras committimus. Stricte vero praecipimus ut, nisi prius quae supra diximus fidei
professionem et iuramenta emiseris, nec Tu consecrationem ipsam recipere audeas, nec eam Tibi impertiatur Antistes a Te electus, sub poenis, si huic No-
stro praecepto contraveneritis, iure statutis. Firmam autem spem fiduciamque concipimus fore ut, dextera Domini Tibi assistente propitia, Ecclesia Bru-
nensis per tuam pastoralem industriam et indefessum studium regatur utiliter et maiora in dies in spiritualibus ac temporalibus suscipiat incrementa.
Datum Romae apud S. Petrum, anno Domini millesimo nongentesimo quadragesimo sexto, die tertia Aprilis mensis, Pontificatus Nostri anno
octavo. Pro S. R. E. Cancellario.
+ Januarius Card. Granito Pignatelli di Belmonte
Decanus Sacri Collegii
+ Alfonsus Carinci, A. Seleucien., Sec. S. R. C. Ep.
Alfridus Liberati, Canc. Apost. Adiutor a studiis.
Expedita
die duodecima Aprilis
Anno Octavo.
Alfridus Marini Plumbator.
Reg. in Canc. Ap. Vol. LXXI - N. 39 - Aloisius Trussardi.
A. Marini Scriptor Apli(cu)s