Pius Episcopus Servus Servorum Dei Dilecto Filio ~estimando~ Cathedralis Ecclesiae Wratislaviensis Praeposito Salutem et Apostolicam Benedictionem. Romani Pontificis providentia circumspecta Ecclesiarum et personarum ecclesiasticarum quarumlibet statui et indemnitatibus paterna consideratione prospiciens, illis libenter de opportunis subventionis remediis providet, per quae ipsarum Ecclesiarum et personarum jura et privilegia illibata serventur, et ne in eorum praejudicium aliquid attentetur, salubriter occurratur. Sane pro parte Venerabilis Fratris nostri Henrici Episcopi Wratislaviensis nobis nuper exhibita petitio continebat, quod licet ipse et praedecessores sui Wratislavienses Episcopi, qui pro tempore fuerunt, a tempore cujus contrarii memoria hominum non existit, in pacifica possessione vel quasi juris percipiendi et habendi decimas, oblationes, et alia jura parochialia in certis locis et villis suae dioecesis consistentes, et ad mensam suam episcopalem spectantes, fuerint et sint, prout est ipse Episcopus de praesenti; nihilominus tamen nonnulli clerici et laici, eorum nominibus et cognominibus, ac statu et conditione penitus ignoratis, decimas, oblationes, et alia jura hujusmodi, ad dictam mensam spectantia, temere occupare, detinere, et in suos usus convertere, ac eidem Episcopo super illis multiplices molestias et injurias inferre praesumpserunt et praesumunt in animarum suarum periculum, et ipsius Episcopi ac mensae praedictae grave praejudicium et detrimentum. Quare pro parte dicti Episcopi nobis fuit humiliter supplicatum, ut sibi et mensae suae praedictae super hoc de opportuno remedio providere de benignitate apostolica dignaremur. Nos igitur, qui jura et privilegia Ecclesiarum et personarum ecclesiasticarum illibata servari summis desideriis affectamus, hujusmodi supplicationibus inclinati, discretioni tuae per apostolica scripta mandamus, quatenus, si est ita, illos, quos decimas, oblationes, et alia jura hujusmodi occupasse, detinuisse, et in suos usus convertisse, ac eidem Episcopo super illis molestias et injurias intulisse constiterit, ad restituendum decimas, oblationes, et alia jura hujusmodi, ac desistendum ab hujusmodi molestiis et injuriis, per censuram ecclesiasticam, appellatione remota, compellas; invocato ad hoc, si opus fuerit, auxilio brachii saecularis. Non obstantibus constitutionibus et ordinationibus apostolicis, ac statutis et consuetudinibus dictae Ecclesiae Wratislaviensis, juramento, confirmatione apostolica, vel quavis firmitate alia roboratis, caeterisque contrariis quibuscunque. Datum Romae apud Sanctum Petrum, Anno Incarnationis Dominicae Millesimo Octingentesimo Septuagesimo Sexto, Sexto Kalendas Februarii, Pontificatus Nostri Anno Trigesimo primo.
L. C. A.
Expedita viij. Kal. Februarii A(nn)o xxxj. Jacobus Gallo
J. de Perez
Visa
L. A. de Liano
Registrata
Gratis
Pro D(omi)no
J. de Perez