Ich Alber den zeiten Richter in der Freinstat vergich offenbar an disem prief
und tun chunt allen den di in an sehent oder horent lesen di nu lebent oder hernach
chunftig sint daz ich mit wolbedachtem mut und mit gutem willen meins besten
freunt han gegeben willechlichen und gutlichen meinen weingarten nach meim tod
ze wachauwe der gesazzen ist ze puhel an dem pruntal den ich gehabt han und noch
han unz an meinen tod ze rechtem purkrecht und dent alle jar ze purkrecht an
sand Michels tag vier und zwainzik nuwer phennig wiener munze und ein phunt wachs
hinz sand Michel unser frowen sand Marien hinz dem chloster gen dem Hohenfurt ze
einem rechtem selgeret also daz mein da von gedacht sol werden und meiner liebe
hausfrowen von Kunein der got genad und meins bruder Hainrichs des smit und
schullen daz tun di heren gemainchlich wand si den weingarten niezen schullen in dem
choster nach meim ains tod so ist er ir ledichlichen und hat dar auf furbaz niemen
mer ze sprechen Daz in di red stet und unuerchert beleib hin fur ewiclichen dar
uber gib ich Alber disen offen prief zein urchund mit meim anhangunden Insigel und
mit der Freinstat Insigel und mit meins bruder Insigel Vlzen des schaffer mit des
willen und rat iz geschehen ist. Der brief ist geben nach christes geburt Tausent
jar drev hundet jar dar nach in dem vier und drevziksten jar an sand Symonstag
in der Freinstat vor irn leuten