Ich Czastowoy von Walkunslag . ich pržiedslawa sein elich hausfraw . vnd alle vnser erben verjehen vnd tun chunt
offenlich mit dem brif allen den di in sehen oder hörn lesen di nu leben oder hernach chunftig sind daz wir mit wol
uedachtem mut mit gemaym rat vnd gunst aller vnser frunt ze der czeit do wir es wol getun mochten recht
vnd redlich verchaufet haben vnsers rechten freys aigen erbs czway pfunt pfenning geltez wienn(er) mýncz die
gelegen sind auf gestiften holden da di czeit auf gesezzen sind . vnns . waurin . philipp . vnd straucho . der yzlicher
aller jar dynet vnd cynset aýn halb pfunt pfenning steure pfenning ze sand gallen tag vnd steure pfenning ze
sand Jörgen tag in dem dorf ze walkunslag mit allen den rechten vnd nuczen . als wirs vnd vns(er) voruod(er)n in nucz
vnd in gewer herbracht vnd inne gehabt haben dem geystlichen h(er)ren prud(er) hoygern . prald(er) ordens dez chlost(er)s
ze hohenfurt nach rat hilf vnd gunst dez abtez vnd dez couents gemaynchleich dazelbs vmb vierczehen schok
gros prag(er) pfenning der wir von ym gancz vnd gar verricht vnd gewert sein wir haben ym auch di vorgen(anten) czway
pfunt pfenning geltez verchaufet vnd geben in solicher beschaidenhait daz si ym di weil er lebt nur ze sein(er) notdurft
er sey inner lants oder ausser lants sullen geuallen an all wid(er)red vnd nach seym tod so sullen diselben czway pfunt
pfenning geltez mit allen den rechten vnd nuczen als vor geschriben stet in dasselb chlost(er) ze hohenfurt furbas
ewichleich gehorn vnd geuallen an allen chrieg irrung vnd widred vnd durch ein pess(er) sicherhait so globen wir
ich vorgen(anter) czastowoy . ich pržiedslawa sein hausfraw vnd all vns(er) erben vnd ich peter von troyano ich marchart
von metlyn vnd ich jess(er) genant zwietli von chirichslag mit gesampter hant vnd vnuschaydenlich di vorgenan(ten)
czway pfunt pfenning geltez ze freyn vnd entweren vor allen leuten vnd sein der auch recht schirm vnd gewer
fur allen chrieg vnd ansprach als freys aýgens recht ist vnd dez landtz recht ist ze Behem an allez geverd vnd
ich czenante pržiedslawa verczeich mich an dem brif gancz vnd gar aller ansprach vnd allez meins tayls der
mich angepurt vnd angehört von meim margengab wegen an denselben czwayn pfunt pfenning geltez vnd
daz dize red also stet vnd vngebrochen beleib dez geb wir ich vorgen(anter) czastowoy ich pržiedslawa sein hausfraw
vnd all vns(er) erben dem vorgen(anten) prud(er) hoygern vnd dem couent dez chlosters ze hohenfurt den brif versigelten
mit der vorgen(anten) vns(er) frunt petreins von troyano marcharts von metlyn vnd jess(er)lein genant zwietli von
chirichslag aigen anhangunden Infigeln wan ich oftgenant(er) czastowoy nicht aigens Infigels hab so verpind
ich mich czastowoyn mich pržiedslawan sein hausfrawn vnd aller vns(er) erben drumb mit voller chraft gar
vnd gancz der brif ist geben do man von christes gepurd dreuczehen hundert jar vnd darnach in dem drev
vnd sechczigsten jar an sand matheus abent dez heiligen ctwelf poten vnd ewangelisten .