Wier Georgius Schrodt des Wuerdigen Vnser Lieben Frauen Gottshauß vnndt Closter Hohen
fuertt Abbte, bekhennen hiermit vnndt in krafft dieses, demnach an heutt vndersetzten dato fur vnß
erschinnen, des Erbaren dem Herrn Lieben Herrn antecessoren gewesenen getreuen müllers Adam Hermans,
von Freyburg auß Meissen ehelige hinderlassene wittib, sambt Zwayen Wäyßen nahmens Baltha
sardt vnndt Anna, vnß in gehorsamb fürtragendt, waß gestalt sie die von ihrem Lieben Vatter
erblich erkauffte bey der Sägmuell drüben dem Bächlein vnndt an der Muldaw liegende stell vnndt
erbautes häußel, armuets halber nicht länger möchten erhalten, sondern verkhäuffen müesten, Daß
wier auß erheblichen Vrsachen, vnndt fürnemblich in bedenckhen des Closter nutz, solches von ihnen
khäufflich angenummen vnndt erkaufft p(ro) ein Hundert Gülden, legndt blieben gemelten Wäyßen
Aber Sechzig, Vermüg des Inuentarij außmüssig erfundene gulden, vnß auß zubezalen, vnndt ihnen
in gleich zutheillen vierzig gulden. Weil nun die wittib ihren theill zuuor zimlich genossen vnndt laut
eigener bekhandtnüß eingenummen, hat sie weitter nichts zuerben, alß auß ein Zeit lang vnserem be
lieben, vnndt ihren verhalten nach freye hebung zuigewandten den wäyßen aber wo fern sie ihnen guets
selbst befürderlich, soll von vnß oder vnseren Successoren, das gelt nemblich Vierzig Gulden, in gueter
Landtgeliger müntz, zu erziehendt ihrer nothdurfft vnfehlbarlich erlegt werden. Vhrkhundtlich ver
sieglen wier sie mit dissem vnden gedruckhtem den Zeit mittlerem Abbtig(en) Insigill vnndt eige
ner handtvnderschrifft Verfertigten schein, der Geben ist in obbesagt vnserem anuertrauten Closter
Hohenfuertt, den 14 februarij Lauffendts Sechzehenhundert Drey vnndt Dreyßigisten Jahrs.

heutt dato den 2 7bris empfangen an begrebnis
Daß Balthasar hat 1 fl gulden erlegt Ao 1634
den 2 Martij hat Melhior abram empfangen von Ihr E(rwürden) siben gulden Ao 1636

Ao: 1646: den 31 Octob: hatt Balthasar
wegen Wegen seines Weibs Anna
die 28 fl so restirn, dieß siegel bey den
Vergwissell laut dises briefs nach Zue
gewesen, Vons Closter Völlig empfangen

Georgius Abbas
mpria