Wir Iheronimus von gotlicher vnd Bapstlicher fursehungkait Abbt zu Obrowitz Vnd in vnserm nomen an vnser stat der Erewirdig Her Bartholomeus probst daselbst zu Obrowitz Ordens von
santi Augustini der heremiten in den lannden czescher Osterreich kernd(er) der Iohannes pergmaister prior Vnd in irem nomen des ganzen Conuents des Closters zu sand Thoman awsserhalb
der statmawre Zu Brunn des benanten ordens santi Augustini der Heremiten aintail Auch wir Vrban plattner Niclas puchal vnd Hernadus all drey burger zu Brunn von dem
tayl des Namhafftigenn Vrban Netl vom Aldenstat mitburger zu Brunn Bekennen vnd thun kund offenlich mit dem brieff allen den er furkumbt Das dy obgenanten bayde tayl Vater prouin=
cial her prior in irem vnd des ganzen Conuents des benantn Closters nomen von ainem Vnd Vrban Netl in seinem seiner erben miterben vnd nachkomen nomen von dem andrn tayl ains
vnd vnbetwungen vleissiglich pitund vns des also angunemen vmb alle sachen so sie vnd ire vorfader von wegen aines teichs tam wald ecker wis vnd marck bey dem dorff Schebetin gelegen
Welich dorff der benant Vrban Netl helt vnd besitz mitsambt den lewthen daselbst zu Schebetin stossund an den wald vnd perg pekarua vnd drboweg genant desselb wald vnd perg vor zeiten
von dem durchleuchtigisten Hochgeporn ffursten vnd hern Margrauen Iobst seliger gedechtnuss an obgenanten brudern vnd Conuent zu sand Thoman gegeben vorbriefft vnd mit seinen grenitzen vnd
marck mit nomen benent ist worden ainenander von langerzeit gehabt lewth vnd zeugen doruber gefurt vnd in dy lannktaueln zeugnuss gesetzt habent doruber dennoch sie zwitrachting vnd
vnuerricht sind pliben Vnd vmb alle andere stoss zwitracht zuespruch sach vnd widerfach schaden kostn zerung awfflegung mue vnd sawmnuss so sich daraws aller sachen zwischen in vnzt awff hew=
tigen tag data des briefs begeben vnd verlauffen habent dorynn vberal nichts awssgenomen Vnd vns mit mund vnd handtrewen geredt vnd versprochen habent bey den peen vnd vesten so wir in dise
vnsrn spruch awffsetzen werden alles das war vnd stetzuholden wie vnd was wir als vberlewtth zwischen in in der gutikait erkennen seczen vnd awsssprechen vngeuerlich Derselben freywilligen vber=
manttschafft haben wir vns vber vleissigen pete durch frid vnd gemachs willen Vnd daz sy irer kossten zerungen vnd awsslegungen von bayden tailen sparen mochten vns vnderwunden vnd vns
dorynn gennet haben Zu den obgenanten teich wald ecker wald vnd perg gen Schebetin gangen dy marck vnd grenitz mit alttisten vnd andrn namhafftigen lewtgen die wir darzu gehabn
mochten aigentlich besucht vnd besechen bayden taylen menigere lewt gelent ire clag zuespruch furlegung kuntschafft vnd zeugen aigentlich verhoret brief vnd vorschreibung aigentlichen
Iobsts vorbrieut mit vleiss vberlesen vnd mercklichen gewegen haben Vnd sein des wolbedechtlich nach rathe fromer namhafftiger lewth die von der obgenanten tayl wegen desmals bey vns
waren aintrechticlich vberainkomen Vnd haben also awssgesprochen vnd sprechen auch mit dem brieff als vberlewtth in der gutikait in massen als hernach geschriben volgt Tzum ersten
daz aller vnbilln veintschafft alle zuespruch tayding clag awssweysung dy verzaichnung in der lannktauel adder anderswo vnd alle schadn so sich zwischen den vorgenantn bayden tayln von
aller obgemelter vnd vgangener sachen zerung taydingung vnd versawmnuss wegen vnzt awff hewtigen tag data des briefs begeben vnd vlauffen habent petz vnd kunsst vor sich vor aller
ire nachkomen erben miterben frewnt vnd helffer genzlich abgethan tot vnd hingelegt sein sullen Also daz ein tayl gen dem andern furbas dorumb nicht mer zusprechen noch zueinordern haben sol wedr
mit recht noch ane recht noch in dhaynerlay weis was handlungen an alle geuer Item wir sprechen auch als vberlewtth in der gutikait daz der obgenant teich mit dem tam vnd fischgrubn
mit der awssgussung vnder dem tam die im sunderlich durch vns beschaiden vnd an etlichen orthen mit gartenpuechen gezaichent ist mit wald vnd ecker vnd allen seinen zugehorungen der
dem obgenanten vrban seinen erben miterben vnd nachkomen zu dem dorff Schebetin beleyben vnd besteen sol allen iren fromen zuschaffen an alle irrung nach dem daz den also der Vrban reist=
lich pringat vnd besitz des wir weysung do vns zu recht genueg bedewcht vnomen Vnd wir selber personlich awch alle gelegenhait daselbst besucht vnd besechen haben Item wir sprechen aber
als vberlewtth in der gutikait daz der egemelt Vrban ader seine erben miterben vnd nachkomen die denselben teich innhabn alaine zu dem allernaigsten ablassen desselben teichs vnd dor=
nach hinfur nicht mer awss demselben teich gebn sol den brudern vnd Conuent zu sand Thoman zu Brunn drey schock karpfen vngeuerlich Vnd wenn sy dieselbn drey schock karpfen
gegeben werden vnd bezalt denn so sol der Vrban nettel obgenant seiner erben miterben vnd nachkomen von demselben teich hinfur nichts mer dem andrn tayl das ist den brudrn vnd Con=
uent zu sand Thoman schuldig noch pflichtig sein zuthuen noch zegeben Sundrn sy sullen mit demselben von den brudrn vnd Conuent vorgenanten gantz muessig frey vnd ledig sein zu ewigen zeitn
vngeuerlich Item von wegen des walds vnd perths pekarua vnd drboweg doruber ein geuertigter brief Margraff Iobsts seligen vor vns lomen vnd beweyst ist dorynn dy gelaidengant mit den nomen
des pergs begriffen ist sprechen wir der gutikait als vberlewtth daz derselb perg vnd wald pekarua vnd drboweg in denselben marcken vnd grenitzen als in dem vorgemelten brief sind begriffen pye
an dy wald vnd ecker des dorfs Schebetin beleyben vnd zustehen sol den obgenanten brudern vnd Conuent zu sand Thoman iren nutz vnd fromen domit vnd dorynn zuchandeln an irrung vngeuerlich
Wir sprechen auch dorumb dasman von solichen vnsrn spruch nicht weichen ader abtreten sol welicher vorgenanter tayl des obgeschriben vnsers awssspruchs aller seiner inhaltung nicht gantzlich stet
hielt dorawff trett vnd nicht nachkem es wer in ainem ader merigern artickeln wieoft vnd in welicher mass sich das gepurt zu aller zeit sobalt das geschiht so ist derselb vngehorsam tayl dem
durchleuchtigisten ffursten vnsrn genedigistten hern Margrauen zu ayschen derda ist ader in zukunfftigen zeiten wirt zu rechter peen Hundert mr grossn landtsgewiger werung zugunds
zegeben Vnd dem andrn tayl aller seiner zuespruch vnd rechten verfallen sein an alle gnad vnd darumb sol der gegeburig vnd awspruch an in selbs bey gantzer macht crafft vnd stet beleyben an all ir
bayder tayl vnd menigclichs von iren wegen anfecht vnd widersprechen an geuer Des haben wir als vberlewtth yetem aigenantn tayl den gegenburtigen vnsrn spruchprief in gleicher lawe geben
versigelt vnd bestett mit vnsrn anhangunden insigeln durch vns vnsrn nachkomen vnd erben an schadn Nach Cristi gepurt Virczenhundert vnd dornach in dem Acht vnd sybentzigisten Iaren
am freytag vor sand peters tag Stuelfeyr Vnd wir Andreas prouincialis Iohannes pergmaister vnd der gantz Conuent des Closters zu sand Thoman zu Brunn obgenantn mit
vnsrn anhangunden Insigeln Darzu auch ich Vrban Netl egenanter mit meinem anhangunden Insigel alle vnd yttliche obgeschribene sachen in allen puncten clawssulen puncten vnd artickeln
von rechter wissenschafft mit guten willen vnd freyer wilkur beweren beuesstigen vnd bestetichen ewiclichen vnd vnwiderrufflich zutun zuloßen vnd zehalten Das ist geschehen Iar vnd tag