Nos Martinus filius Johannis Judex Jurati Cives de Bruna tenore presencium significamus quibus expedit universis Quod honorabilis vir dominus Johannes presbiter filius quondam
Valentini Czipan dicti plebanus theutonicalis ecclesie in Gecz personaliter coram nobis constitutus una cum provida domina Elizabeth uxore sua legitima sponte libere
et fassus est coram nobis recognoscens se vendidisse et titulo vendicionis alienasse provido viro domino Mathie presbitero filio quondam
suo fratri germano et suis heredibus ac successoribus legitimis unam curiam suam integram cum omnibus suis pertinenciis juribus et utilitatibus
universis prout eadem curia in suis metis et terminis est distincta et limitata sitam in Gecz in qua ipse dominus Johannes presbiter
habitavit et quam a provido viro domino Mathie presbitero fratre suo germano pro certa summa pecunie emit et comparavit
pro sexaginta marcis grossorum denariorum monete in Moravia currentis et usualis de quibus quidem sexaginta marcis grossorum
prefatus dominus Johannes presbiter recognovit se a prefato domino Mathie presbitero fratre suo germano plenarie et integre
levasse et recepisse nichil penitus in eisdem sexaginta marcis grossorum sibi reservando sed eandem curiam cum omnibus
suis pertinenciis juribus et utilitatibus universis prefato domino Mathie presbitero fratri suo germano et suis heredibus ac successoribus
legitimis dedit tradidit et assignavit in hiis scriptis perpetuo et in evum tenendam habendam possidendam et pacifice
usufrutuendam In cujus rei testimonium sigillum nostrum civitatis nostre Brune presentibus est appensum Datum Brune
feria secunda post festum sancti Luce ewangeliste anno domini millesimo quadringentesimo octuagesimo octavo