Ich Katherina eweim gut gedechtnisse des erwn mans Bohussen von Tussnowitz eliche kon vnd hausfraw bekenne vnd tun kunt mit disem brieff alln
den dy yn sehen oder horen lesen daz ich mit wolbedachtem mut mit freunt rat mit gutem willen vnd mit gesuntem leib mein hoff der do gelegen ist
Auf der schutt gegen dem spital der zu sant Stephan beschaid raum also doch daz ich des gewaldicht sey dy weil ich leb vnd noch meim tode gib ewichlich
mit aller sein zugehorunge vnd nuczen als hernoch benenet vnd bescribn stet als ich jn vnd mein vorgenent elich wirt gehalden habn zu dem Newen klost(er)
zu sant Thomas daz am statgben leit bey Bune for Penner tor zu nuczen vnd zu besiczen ewichlich als wirs besessen habn In sulher weis vnd darumb
daz mir der Gaistlich vnd erwer man her Augustin der por doselbst im Newn klost(er) gelihen hat daz ich im aufgebabn han Sechzik mark g(u)ter p(re)niss
muncz mitwiss gal damit ich mein sult vnd den forgenten hoff vnd daz darzu gehort gelediget hab Auch forbas sol der por oder sein nochkumen od(er)
das conuent alle mein schult gelden vor meim tot ob ich icht suldik wer beliben daz ich sye oder mein gesheft edlich beweisen mochten an alle wider
rede vnd auch also waz der vorgenant hoff vnd daz dazu gehort als hernoch bescribn ist besser wer dan main ich dem vorgenantem klost(er) zugeben mir
vnd meim vorfodern zu eim ewigen selgeret als billich vnd recht ist zuhalden von dem conuent von erst gehort zu dem hoff fier gewanten dye do
ligen in dem dornech daz ich gekauft han wider die prediger zu sant michel vnd auch ein langen acker der ist ein halber huff vnd aber ein acker
gewanten vnd sint swey Ich han auch kauft wider den Blanken ein acker der leit beym galgen der czinst zu sant Jndutn ein phunt wachs
vnd aber von Stwepan von Schirnawitz han ich kauft ein acker der auch leit bey dem galgen der czinst auch ein phunt wachs zu sant Jndutn
Nu han ich auch kauft zu der cimeterin zu Schirnawitz ein acker der cinst derselbn vrawn ein grossen Auch kauft ich zu Schibitz kuncz niklos
Furst ein fieve prayten vnd doselbst kauft ich czw gewanten dy do ligen im mortal dy czinsent gen Zabrowitz Sechs gros vnd den czehent
nu ligen vorm dornech czw prayten daz wol wissent ist dy gehorn in dy losunge gen Bune do bey ligen drey prayten von drein gewanten dy sy
habn do bey leit auch ein gescheybte pyten dy hat acht gewanten vnd dobey leit auch ein klaine prayten vnd heingegen eweyt des wassers
leit auch ein klainer acker Auch ist tzu dem hoff der Spikacker der get vntz an daz dornech vnd zu der aschpen vnd gemicht an dy stras
dy do get zu den kartusern derselb wek od(er) dy stras gehort halb her an do ligent auch czway klaine ekkerlin zu den kein holz noch weyden nicht
gehort Auch leit bey dem forgenantem hoff ein garten der haist der passawer vnd in demselbn garten ist ein stat aufgemerkt daz haist
daz selgert dy czinst den sichen in daz vorgenant spital ayn halbsok g(u)t vnd gehort in dy losunge Auf dem vorgenant(en) hoff vnd waz dazu
gehort schaff ich noch meim tod Martino meim bruder sun m(ar)kel wagner czw mark gross dy weil er lebt noch seim tot sol ez zu dem
vorgenant(en) klost(er) kumen noch ist ein garten ym dornech der gehort in dy losunge der do leit bey der aschpen furhas so sprich ich daz mich
nymant an mein farender hab hindern sol weder por noch conuent vnd auch ir noch kumen also daz ich sye mag gebn vnd verkauffen
wem ich wil an alle wider rede Vnd des zu einer grossern vorsichtikait vnd zu eim gegenwurttige(n) g(e)czeug habn die erwen lewt her heinrich
oler vnd heril kramer purger vnd schopfen der stat zu Brunne durch meiner bet willen gehangen an disen brieff der gebn ist noch cristis
geburt dreyczehenhundert Jar vnd in dem Sechs vnd achtzigistem Jar an des heyligen sant Augustins tag des lerers