Wir Bürgermaister Vnd Rhats der Chürfürstl(ichen) Haubtstatt Strau
binng in Nidern Bayrn am Tonnaußstrom gelegen, Bekhennen hiemit offent(lich) gegen menigclich, das an heünt dato in Rathsamb
letem Rhat vor Vns erschinen ist, der Erngeachte Mathias Hiltscher seines Handtwerckhs ain Lederer, Weyll(and) Tobie Hiltscher gewesten
bürger vnd Lederers allhie, vnnd Elisabetha ehren Ehewürthin nünmehr beeder seel(igen) Eheleiblicher Sohn, Gehorsamblich vorbringendt, Welcher
gestalten Er Crafft des an Vns, von der Hochfürstl(ichen) Byschofflichen Statt Nysaw in Mähren abgelasnen Schreibens, sub dato deßen den zwaintzigisten
Nouember bewüsen, sich alldaselbsten heüßlich niderzulaßen vorhabens, zue deme aber seiner Ehrlichen Geburth, vnd d(as) Er niemandts
mit Leibaigenschafft vnderworffen oder zuegethon, glaubwirdige Kündtschafft bedürffig seye, Solchergestalten bittendt Ihme selbige Vngehin
dert züe thailen, Vmb aüch hieraüff nach beschehener bewilligung, die Erngeachten Hannßen Läypoldt Siben vnnd Fünffzig: vnnd Hannßen Zängl Fünff
vnd Viertzig Jahr alters, ebenfalß beede Vnsere Müttburger bürger vnd Lederer allhie, alß Haber: wahrhafft: vnd vnverleumbte Männer, welche
vmb solch sein Producentens Ehrliche Geburth guetes wißen haben sollen, züe Gezeügen fürgestelt, da Vns bei ihren Aydts pflichten, mit aüffheb
ter aüff ehren Vorgesetzt bürgerlicher obrigkheit vnderworffen, beständigliches züesprechen, souil anlaittendt, vnd anzaigt, d(as) Ihnen vmb der Zeügen solches
Eltern VerEhelichung, hüngnung, vnd Hochzeit, weilen deren khaines allhie, sondern züe düngkling beschehen, zwar nichts: iedoch souil wolbewüst, das
ernendt Hiltscherische Eheleüth, welche vnsers selbteigen wißen nach von ernandten düngkling, necher Beüstadt, vnd Volgendts von dannen anno Sechzehenhund(ert)
zwei vnd Fünffzig anhero nacher Straubing khomen, alda sich heüßlich Nidergelaßen, Vnder ihrem allhiesig Ehelichen beisamen wohnen, neben andern
Khindern, den Producenten Mathiam Hiltscher, in anno Sechzehenhundert Vier vnd Fünffzig Ehelich erworben, welcher in der allhiesig chürfürstl(ichen) Collegiat
Stiffts: vnd Pfarrkhirchen S:S: Jacobi et Tiburtij Christlich Catholisch getaüfft, Von Augustino Schmidmair bürger vnnd baderern alda seel(igen) Crafft Vorgelegt
authentisch verfertigten Tauffzüdl, aüß der heyl(igen) Tauff gehoben: vnd von meniglich vor Tobie Hiltscher: vnnd Elisabetha ehren Ehewürthin Eheleiblicher Sohn
erkhennt: vnd gehalten worden, Gestalten Vns aüch gar woll bewüst, d(as) beede Eheleüth, niemandt mit der leib aigenschafft, welche Ihne ohnehin ohn
das nit herkhomen, zuegethon gewest, Dahero aüch Er Producent mit dergleichen nit behafft, sein khann, Dieweilen dann meniglich die
wahrheit züe befürdern schüldig, Alß haben wür eingangbermeltem Mathia Hiltscher alß Producenten diß sein begeren nit abschlagen, sondern
der wahrheit züe Steür, aüß sein Gehorsambes Anlangen, disen mit Vnserm: vnnd Gemainer Statt Mittlern Secrete verfertigten Geburths
brieff ertheilen wellen. Geschehen den Zwölfften Monaths tag December, Im Seintausent, Sechshund(ert) Neün vnd Achtzigsten Jahr.