Ich czechel von brvn vnd Margret seyn eeliche haussfraw bekenen vnd tun kvnt offenlich myt desem pryf
das wyr dy mvl genant yn dornach vfgenomen haben von den geystelichin vnd erbern herren dem And(re)as
prior vnd von dem ganczen c(on)uent des closters der heilgen dryfaldikeit czu chunigsfeld cartus(er) orden vnd
vns deselben vnderwunden haben dy czu besiczen vnd czu haben myt steyn vnd eysen vnd aller czugehorung besunder
myt eyme acker vnderhalb der mvl von dem man jerlich eyn schok czinse vnd myt ey(n) pawmgarten yn der mvl vnd
myt eyner wis(en) dy do myt dem selben vmbgefaet ist pey w(a)gner w(e)g gegen den galgen yn der weys als sy dy meyster
hans vnd meyst(er) czechel mvlner czu brvn gehabt vnd gehalden haben also das wir dy selb mvl von naws pawen
schollen vnd allewegen wol gepawt halden vnd von tag czu tag waz not ist daran czu pesseren vnd dy schollen wir
haben czu vnser peyder leyb als lang wyr leben yn sulich(er) mas das wyr der von alle jar czinsen schollen zcehs mut
gutes getreydes als yn dy mvl chvmpt halb waicz vnd halb chorn alle e(m)berten anderthalb mut halbe(n) waicz vnd
halbs chorn vnd das v(er)hays wir czu rüchen vnd czu geben den egenante(n) h(er)ren vnd yr nachchvmen alle jar als lang
wir leben vnd das selb getreid schol wir yn malen do selbst yn der mvl vmb sust an alle mawt vnd ob wir das nicht
teten vnd das egenante getreid auf dy selben tag nicht geben den vorgenanten h(er)ren oder yn fyerzcehen tagen dor nach
so schollen sy das selb getreid oder das des getreydes wert ist nemen yn juden oder yn christen auf vnser schaden vnd
des geben wir yn den ganczen gewalt myt craft dys prifs vnd wan vnser her vber vns gepawt das wir peyde ab
gen vnd sterben so schulle dy mvl wider an dy vorgenante h(er)ren vnd an das closter gevallen an alle hyndernus vnd
wyder red vnd sy angehoren als vnd yr nachchvmen sye vor haben gehabt myt der wys myt dem acker myt dem pawm
garten vnd myt steyn redern eysen vnd aller czugehorung vnd myt allen gepawde als dy mvl funden wirt vnd dar
aus scholman nichtes nemen das angeport oder angenaglt ist vnd des czu eyner geczeugnus haben wir gebeten dy
erbern vnd weysen h(er)ren dy schopfen vnd den rat czu brvn das sy yr stat ynsigel angehagen haben an dysen pryf
der gegeben ist noch cristi gepurt fyerzcehenhundert vnd xxj jar an den nehsten montage noch synte Margarethen