Ich Wenczlab lang purger zu brün bekenn offenlich mit disem brief allen de yn hörn lesen oder den er furkumpt das
ich mit gueter vernunft vnd mit pedachtem muet vnd mit gutem willen Schaff vnd gib dem andachtigen hern vnd
vater prior des gotzhaus vnser frawen tron von gemungk vnd dem ganczen conuent cartusei ordn zu ostereich alle
meine rechtleiche vnd redleiche erbschaft de mich von recht angepiert oder mag von recht an erbt oder anerbn würt
es war von wegen meiner lieben mueter etwon hanns hyslam eleiche hausfraw oder von meinen geswistratn oder
frewntn wie de genant sein oder von wen mir erbschaft zue gefiell macht bin tan geseczt oder aufgenomen das sch=
aff ich als vnd gancz ledigleich dem obgemeltn hern vnd vater prior vnd seinem conuent durch gotes vnd vnser
lieben frawen willen das se de selbig mein erbschaft ein nemen vnd vudern mugen vnd mit geistlichem oder welt=
leichem rechtn suechen vnd empfahen noch dem pesten als se mugen vnd chünnen vnd anlegen ader prawchen
noch irs chlasters nucz vnd frum am pestn als se wissen dem almechtigen got zue er vnd zu trost vnd saligkait mein
vnd meiner frewnt sell des zu vrkund chraft vnd statigkait hab ich diesen brief mit meiner aygner hant
geschribn vnd mit meinem sigl gestatigt vnd hie vnten an diesen brieff angehongen vnd nebn mir de
erbern herrn her hans von tritignaw oder von trzebon Jeronimus von pibein wolfgang polczmacher pur=
ger zu brün de ich fleissigleich dar zu gepetn hab vmb seleich mit gesiglung in vnd iren erben oder noch
chomen an schaden gebn zw brün so man schreibt noch cristi gepuerdt tawsent vierhundert vnd in dem newn=
vnd sechczigisten iar an dem freitag noch dem heiligen phingstag