Ich Regina glewmg(er)in Burg(er)in zw brunn bekhen offenleic~h~ ~mit~ ~d~isem prieff all(e)n den er
furkhumbt oder horn les(e)n das ich hab nach abgang meyn(er) muet(er) Margareth kunigs
felderin burg(er)in zw brunn der gott genad Vnd auch nach abgang meynes steuff vatt(er)
hanns sung kischen mit meyn(er) liebn muet(er) kint ~m~ ~f~rawan hanns rischen
eliche haussfraw vnd all(e)n andern meynne geswist(er)ab(e)n vnd mit erbn hab ein auff
richtige taylung getan von all(e)n guettern vn(d) was mich rechtlich angeerbt hatt zw
der zeyt alss das in aymem pueff der solcher taylung geschribn ist Aussgenomen
was mich angepurdt hiet vnd angeerbt In den zway vnd dreyssig marckh dy mier
vn(d) mein(er) vorgemelt(e)n mit erbn auff dem marckh zw rann(er) verschribn seyn Vnd
den selbign meyn tayl der zway vnd dreyssig marckh was der ist oder wer den
gib ich ledichleich vnd mit guet(e)n willn meynem liebn prued(er) wenzla lang
burg(er) zw brunn das er da mit tue vn(d) schaff als mit dem seynn als pest als er
wil vn(d) ways an alle irrung des zw vrkhund vn(d) warhaft gib ich dysen pueff
mit meynem Insigl hye vnt(e)n an dysem prieff gehangn Gebn zw brunn
an sannd Vrbans tag do man schreybt nach cristi gepurdt tausent vier
hundert vnd newn vnd sechtzig jar