Ulrich von hlawatecz des margtthums czu merhern vnderkamrer den Erbern vnd
Weisen Burgermeister vnd Ratman der Stat czu Znoym mein liben frunden
meinen dinst czuuor Erbern liben frunt Ich lasse euch wissen das Thomas
Zewsscher ewr mitburg vor mich komen ist von der sach wegen als ir
vormals an mich gebracht habt vnd dorumb ir In vorborget hette
vnd hat sich mit mir vereint vnd gericht vnd ist mit mir vmb dieselbe
sach gentzlich abkomen mit czehen schok gr(oschen) doran mir wol genůgt
vnd dasselb hab ich getan durch seiner bete willen vnd durch des willen
das er sich erberklich vnd fruntlich in ewr Stat vnd in ewrm Rat allzeit
gehalden hat vnd also bitte ich ewr erberkeit das ir In wellet gůtlich
vnd liplich vfnemen in allermasse als er vormals in ewr Stat gewesen
ist vnd auch das ir In vnd alle seine Burgen vmb dise sach gancz vnd
gar ledig lasset vnd anders tut nicht als ich euch sunderlich wol
getraw Gegeben vf dem Spillbge des freitags vor Letare Anno (et)c(etera) xvj(o)