Wir ladyslaw von gottes Gnaden Zu Vngern Zu Behem Dalmacien
Crobacien künig Herczog zu Osterreich vnd Margkgraff In Merhern etc(etera)
thun kund mit dem vnsern brieff alln Als den ein Zwitracht gewesn ist auff erstandn
Zwischen vnsern getrewn liebn Burgermaist(er) Ratt der gmayn der statt Znoym vnd
Janken Sigmunts Purgr daselbs von welln das vnser ordnung vnder vnser hoch
wnckait vnd entrechtung von ainand(er) schulln beleibn noch vil Zwitrachtn dy
do gewesn sindt vnder beydn tayln mit vnserm gebott schulln gehaltn werdn So
hab wir Zu let(z) genomen dy sach auff vns selbs vnd dar Zu dy Znoym(er) ir botty
vnd irn mit gesworn Zu vns gesant mit nomen ludus behem Erasm vleisch
hack(er) hannsh steger vn(d) Janko rathuss da da von vhert habn beyd tayll hab
wir dar Zu ger an In begert das sy des mechtiklaich an vns belibn Indem habn sy vns
noch gevolgt vnd des an vns mechtiklaich belibn synt Vnd wir noch erfarung
von vnser ratt der Behemischn vnd der Merherischn habn ein ausspruch getann
vnd habn geschafft vnder beydn tayln sprechn auss von schaffn mit krafft des
brieffs also Von erstn das Zwisch(e)n den obgeschribn beydn tayln aller vnwilln
vnd vngunst vn(d) veyntschafft rechtlaich vn(d) trewlaich v(er)geen schulln vn(d) syn
das In kainen ort ewiclaich nicht auff hebn vnd der obgeschribn Janko mitt
sein frewntn vnd alle dy dar vnder verdacht sindt mitt ir handlung mitt niempant
kin anwesung In der ersamikait nicht geladilt wurdn In der stat als sy ee gewesn
syndt ee sich dy Zwitracht Zwisch(e)n In(n) gehebt hab hat als dann mit vnserm
gebot In vnser gegenwurt vnd vnser ratt mitt Zusam(m) hendt gebn In frid gelassn
sein Auch mit vnser macht hebn wir auff das stwetn dy der Janko Sigmuts
hatt schulln den Znoymern thun als das vrtayll mit vnserm kamerer In
Merhern vnd vnser stett ratt Olmuncz Prun Iglaw vnd Radisch aus gebn
#als ein ordenlaich# vn(d) erfunden hatt vnd das wir von vnser ratt gelobt habn vnd das dy Znoym
Purger auch Zu vnser begir vn(d) gebot habn getann vn(d) In des vberhebt
Vnd darvmb gebietn wir beydn tayln ernstlaich vnder der gnad das den
vnserm spruch vnd gepotn recht trewlaich vnv(er)rukt haltn schulln an
verrukung als frum lewt Vnd des Zu war(er) Zeugnus habn wir geschafft
vnser künigklaich Innsygel auff den brieff Zu drukk(e)n Der gebn ist Zu
wyen am freytag noch sand peters vn(d) sand pauls der heylign Zwelf
pottn tag Des Jars noch Cristi gepurd Tawsunt vierhundert sibn vn(d) dar
noch In dem lvij Jar des Jars vnser künigreich Hungern etc(etera) In dem
Sybnczehen Jar vnd des Behemischn In dem Vierdn Jar