Ich Mert Pogn burg(er) zu der Newnstat bekhen offenlich mitt dem brieff Als ich von mein(er) elichen hausfrawen
der Anna weilent Hestra der Judin zu Znoym gesessen tocht(er) ganczn gewalt hab gehabt mitt ein(em) brieff
besigelt mitt der erbern un(d) weysen des Simons Waldner burg(er)s un(d) d(e)s rates zu der Newnstat und
Fridreichs Folner auch burg(er) daselbst baid auffgedrukten Insgiln zu vord(er)n und einzunemen von dem Ratt
und burg(er)n der statt Znoym zwainczig schok gross gemain(er) müns die ir dan die benat Hestra ir mutt(er)
het v(er)haissen und zusagung getan auff ir(em) haus daselbs in der Judengassen gelegn ehent un(d) v(er)kest hett
des sich der Erest Leskowecz die zeitt haubtman auff dem haus hie zu Znoym dem die Judn bevolhn wordn
hett und(er)wundn umb des willen das die bemeltt Hestra daus was gewichn und hatt das v(er)kaufft un(d) gelt
darub genomen und niemat hatt die zwainczig schokh gevordert zu demselben Leskowecz der newlich ab
gangn ist alle die zeitt als der hochwirdig g(e)dächtnus künig Laslaw (et)c(etera) Im lebn und d(er) land geweltig ist
gewesn Daus v(er)maintn die vorberürtn Ratt und burg(er) mein zuspruch gancz ledig zu sein Doch durch
meines gepets und armutt willen habent si mir nicht von rechts sund(er) von gnadn zehen schok gebn umb
all zuspruch die ich berait von In genomen hab daran mich auch wol benügt Darub ich obgenant(er) Mertt
Pogn fur mich und fur mein gemelt hausfrawen Anna un(d) fur al uns(er) erbn sag die vorgesribn Ratt und all
burg(er) der statt Znoym und ir nachkomen In krafft d(e)s brieffs der benantn zwainczik schok auch das bemeltt
haus und aller and(er) zuspruch die darub möchtn geschehn gancz quit ledig und loas und des zu and(er) warer
gezeugnus und sicherhait hab ich gepettn die ersamen herrn Przibiam pharr(er) zu sand Niklas zu Znoym
und herrn Linhartn Mrazi der pharkirchn zu sand Michel daselbst ain offenbar schreib(er) das si baid ir
Insgel habent auff den brieff gedrukt ir und iren nachkomen an schadn Der gebn ist zu Znoym an sand
Agapiti tag Anno dom(ini) (et)c(etera) L(un)oquinquagesimonono