Ich Melchior Herz von Hernsperg auf Brückspach, Burger vnnd des Ratss zu Znaimb, Vnnd Ich Katterina geborne Türkin
sein ehliche Haußfraw, Bekhennen hiemit baide für vnns, vnnser erben, vnd Erbnehmen, vor meniglich, Das
wir dem Ehrwürdigen vnnd gelerten Herrn Jacoben Waltzer Dechant vnnserm Pfarr vnnd Diener Christi Jhesu,
Eua seiner ehlichen Haußfrawen, vnd Jren baiden erben, aufrecht vnd redlich schuldig worden sein, geloben sollen vnd wellen,
In guetter Osterreichischer Müntz, so sy vns zu vnnsern baiden Notturfften außleichen ansehen vnd bietten, der dergleichen
Benenndtlichen Vierhundert Taller Jeden zu Sibentzig kreitzer geraidt, Geloben vnd versprechen derwegen
gedachtem Herrn Jacoben Waltzer, seiner Haußfraw, Jren baiden erben oder Erbnehmen, oder den Jenigen, so disen
vnnsern Schuldbrieff mit Jrem guettem Wissen vnd willen haben möchten, Benennte Vierhundert Taller, Von dato diß
brieffs Jber ain Jar, das ist auf den Zwelfften tag des Monats Octobris, des nechstkhünfftigen Ain vnd neuntzigisten
Jars, Zusampt dem gebürenden Landtbreüchigen Jnnteresse oder verzeihung, Diß Jars lang Vier vnnd zwaintzig Taller
vor allen trewen vntzug vnnd behelff, widerumben in guetter Landtgeügiger Osterreichischer Müntz, on Jre vnngelt,
kosten vnd beschwärung, mit guettem danckh, an allen abgang gewißlichen Zuerlegen, Da aber solches nit geschehe,
vnd wir disem allem, oder Zum thail was in disem vnnserm Schuldbrieff vermeldt, nit nachkhämen, (das aber nit
sein, vnd hoffentlich nit geschehen solle), Vnnd gedachte vnnser glaubiger mit erlegung der Haubtsumma vnnd Jnnter=
esse gesaumbt, vnd dardurch in schaden khömen würden, So solten sy vnnser glaubiger, mit vnd in krafft diß brieffs
solches alles vnd Jedes, auf vnnsern Hab vnd guettern, alls Jrem vnderpfandt, wie recht ist, Zuesuechen, Zubegeern vnd
Zunemmen haben, Alles trewlich Vngeuärde, Des zu warem vrkhundt, glaubwirdigem gezeugnus vnd
becrefftigung der sachen, Geben wir inen disen Schuldbrieff, mit vnnser baider aigen gewondlichen Jndtschafft hie=
vnden aufgedruckht verfertigt, Beschehen zu Znaimb den Zwelfften tag des Monats Octobris, Nach Christi
vnnsers lieben Herrn vnd seligmachers geburt, Jm Fünfftzehenhundert, vnd Neuntzigisten Jar