Ich Fraw Margret eedwænn Hern Hansen von Cremsier wirtin bekenn vnd tůn chunt allen den dy dysen priff
lesent sehent oder hœren lesen daz meyn wirt selig der vorgenant Hans dem got genad mit den Erbern geystlichen hern
czu Chůnigsfeld Czeigaw ordn vber aýn ist chomen daz sy im in rechter fruntschaft erlawbt haben daz er etlich echer auf
irem grunt czu Czinobig gekawft hat also wann er vnd ich vorgenante Margret ab giengen mit dem tod so schulln dy selben
echer hin wider an den grunt gefalln vmb sust dem closter vnd den vorgenanten herren an alle hindernuss vnd alle ansprach
darnach hab wir der selben echer von Czinobig mer chawft vnd haben awch auf etlich echer gelt gelihen da selbs czu
Czinobig von den selben echern allen vor genanten czins wir den vorgenanten hern vnd dem closter czu Chůnigsfeld vnd
schulln geiten alle jar rechs grůtczins ij mr(c) vnd jx gr(os) halb auf sand Michels tag vnd halb auf sand Jœrgn tag da von
ich vorgenante Margret hab an gesehn vnd betracht daz mir der vorgenant czins ge swer vnd czu vberswendig ist gewesen
da pin ich mit den vorgenanten hern von Chůnigsfeld vber aýn chomen daz sy mir den selben czins all jar hallen haben ge
lazzen so hab ich in dy fruntschaft hin wider getan daz ich in dy vorgenanten echer all mit aýnander geschaft hab vnd gib in
dy an irem closter aygenclich nach meynem tod daz mich got hin nympt so mugen sy vnd schulln sich der selben echer gancz
vnd gar aýgenlichen vnderwinden vnd dar an halden vnd sy besiczen wie sy funden werden mit sat oder an sat schullen
sy der gewaltig seýn vnd machen sy der gewaltig als wærn wir in mit irem vrlaub besiczen haben also schulln wir vns
geben in dy hin wider als iren aýgen grunt an alle hindernuss vnd alle irrung vnd ob ich dy vorgenanten echer selb
nicht pawen mocht oder wolt so mag ich dy gelassen czu pawen wem ich wil in den vorgenanten pawten vnd anslagen
alz lang ich leb vnd nicht lenger mit vrkunt ditz prifs vnd wann ich vorgenante Margret aýgens Insigls nicht hab
da von hab ich gepeten dy Erbern hern hern waczlab hás vnd hern dominik dy do schepfen waren czu der czeit
daz sy ir Insigl an aýner waren geczeugnuz vnd vrkunt an den priff haben gehangen in an allen schaden do man zalt
von Cristi gepůrd virczehenhundert jar darnach in dem funften jar an vnser liben frawen tag czu der schidung :