Wir Ferdinand der Ander von Gottes gnaden Erwelter Romischer Kaiser
zu allen Zeiten Mehrer deß Reichs, in Germanien, zu Hungern, Beheimb, Dalmatien, Croatien vnd Sclauonien rc. König, Ertzhertzog zu Osterreich, Marggraff zu Mähren, Hertzog zu Lützenburg vnd in Schlesien, vnnd
Marggraff zu Laußitz. Bekennen offentlich mit disem Brieff, vnd thuen kund allermänniglich, demnach Vns der Ehrnueste, Vnser Beheimischer Cammer Rait Rath, vnd lieber getrewer Simon Schwäbel von
Schwalbenfeldt, Vnterthänigst zuuernemmen geben, waß gestalt Er in Vnserm ErbKönigreich Beheimb vnd dessen Incorporirten Landen sich einzukauffen Vorhabens, Vnd weilen solches ohne Vnsern Königlichen Consens nicht beschehen könte,
vmb ertheilung desselben Vns gehorsambst angelangt vnd gebetten, Vnd Wir nun gnedigist angesehen, solch seine demüttigiste bitt, wie auch die getrewe, gehorsambe, vnd ersprießliche dienste, so Vns, vnd Vnserm Hochlöblichen
Ertzhauß Osterreich Er bey Vnser Königlichen Beheimischen Camer nunmehr in die Siebentzehen Jahr, in Vnderschiedlichen diensten vnd Verrichtungen, auch in Vnd andern wegen gantz Vnuerdrossen, vnd vngespartes fleisses bezeigt vnd gewisen,
sein, Auß innigen gehorsam zuerweisen erbötig ist, auch wol thuen kan, soll vnd mag, Darumb so haben Wir in obbemeltes sein gehorsambstes suchen in Kayser: vnnd Königlichen gnaden bewilliget, Thuen
das auch hiemit, vnd in krafft dieses Brieffs, wissentlich, Bewilligen vnd lassen zu Ihme Simon Schwäbel von Schwalbenfeldt, vnd allen seinen Eheligen Leibs Erben, vnd derselben Erben Erben, an Höfe vnd Güttern in Besagtem Vnserm
ErbKönigreich, oder dessen Incorporirten Landen Güttern zukauffen, oder sonsten durch rechtmessige Mittel an sich zubringen, Dieselben zu besitzenn, widerumb zuuerkauffen, damiten nach Ihrem besten willen zu disponiren, vnd damit
zuthuen, alles das Jenige, was andere Eingeborne oder angenommene Landtleuthe Vnsers ErbKönigreichs Beheimb vnd dessen Incorporirten Länden mit Ihren Güttern zuthuen befuegt, auch aller vnd Jeder Recht vnd Gerechtig=
keiten, wie auch Vnserer Königlichen Landt Taffel, deren sich dieselben von Rechts: oder gewonheit wegen gebrauchen, geniessen, vnd erfrewen, gleichfals in allem vnd Jedem gebrauchen, geniessen, vnd erfrewen sollen vnd mögen, Von men=
niglich Vngehindert, Vnnd gebieten darauff allen vnd Jeden Vnsern Vnterthanen, was Würden, Standts, Ambts oder Wesens die in Vnserm ErbKönigreich Beheimb vnd dessen Incorporirten Landen sein, hiemit
ernst: vnd festiglich, das Sie mehrbesagten Simon Schwäbeln von Schwalbenfeldt, vnd seine Ehelige Leibs Erben vnd derselben Erben Erben, bey dieser Vnserer Ihm ertheilten bewilligung, in keinerley weiß noch wege, beirren noch
beschweren, Sondern Vielmehr Sie derselben erfrewen, geniessen, vnd darbey geruhiglich verbleiben lassen, darwider nicht thuen, noch andern solches zuthuen gestatten, bey Vermeidung Vnserer schweren Straff vnd Vngnade, Das
meinen Wir ernstlich. Zu Vrkundt diß Brieffs, besigelt mit Vnserm Kayser: vnnd Königlichen anhangendem grössern Insigel, Der geben ist in Vnserer Stadt Wien den Ein vnd dreissigsten Tag deß Monats Martij,
~nach~ ~Christi~ ~Vnsers~ ~lieben~ ~Herrn~ ~Geburth~ ~Im~ ~Sechtzehen~ ~Hundert~ ~vnd~ ~Neun~ ~vnd~ ~Zwaintzigisten~, ~Vnserer~ ~Reiche~, ~deß~ ~Römischen~ ~Im~ ~Zehnden~, ~deß~ ~Hungarischen~ ~Im~ ~Eilfften~, ~vnd~ ~deß~ ~Beheimischen~ ~Im~ ~Zwölfften~ ~Jahre~.