WIR Ferdinand der Ander von Gottes gnaden Erwelter Römischer Kaiser
Zu allen Zeiten, Mehrer des Reichs, in Germanien, zu Hungern, Beheimb, Dalmatien, Croatien vnd Sclauonien (etc.) König, Ertzhertzog zu Osterreich, Marggraff zu Mähren,
Hertzog zu Lützenburg vnd in Schlesien, vnd Marggraff in Laußnitz. Bekennen offentlich Vnd thuen kundt mit disem Brieff allermäniglich, Wiewol Wir auß Römischer Kaiser(licher) vnd König(licher)
lieber, höhe vnd Würde, darein Vns Gott der allmächtige gesetzt, auch angeborener Guete vnd Miltigkeit, Iederzeit genaigt sein, aller vnd Ieglicher Vnserer gehorsamben vnd getrewen Vnderthanen Ehr, Nutz, auff
nemmen vnd bestes zübetrachten vnd zübefördern, So seindt Wir doch billich mehr gewogen, die Ienigen, welche Vns vnd Vnserm löblichen Ertzhauß Osterreich, Vor andern mit stetter, getrewer vnd gehorsam
mer dienstbarkeit anhengig vnd Verwandt seindt, mit sondern Ehren, Würden Vnd gnaden zübegaben. Wann Wir nun gnedigst angesehen, wargenommen vnd betracht, die fürtreff
liche guette qualiteten, Tugendt, Geschickligkeit, vnd Vernunfft, damit Vor Vns der Ehrnueste Vnser Rath, Rath bey Vnserer Königlichen Behemischen Camer Büechalterey, vnd lieber getrewer Simon Schräbel von
Schwalmenberg, berüembet worden, insonderheit aber die getrewe, gehorsambe vnd fleissige dienste, so Vnß, vnd Vnserm Hochlöblichen Ertzhauß, Er fast in die Zwaintzig Iahr hero, bey gedachter Vnserer Behemischen Camer
vnd sonsten bey Vorgangener hochschädlicher Rebellion, in Vnderschiedlichen Ihme auffgetragenen gefehrlichen Commissionibus Vnd Verrichtungen, gantz Vnuerdrossen, Vnd zü Vnserm sathsamen gnedigsten Contento trewlichst
bezeigt vnd erwiesen, nicht weniger solches noch dato thuet, vnd hinfüro züthuen erböttig ist, auch wol thuen kan, soll vnd mag. So haben Wir demnach, aus wolbedachtem Mueth, guettem
Rath vnd rechtem wissen, gedachten Simon Schräbel von Schwalmenberg zü Vnserm Kaiser(lichen) vnd Königlichen Rath gnedigst gewürdiget, auff, vnd angenemmen, Machen, erieff vnd würdigen Ihn darzü hiemit wissent
lich in krafft dises Brieffs, Mainen, setzen vnd wollen, das Er nun hinfüro Vnser Rath sein, Von männiglich darfür gehalten, erkennet, geehret, genandt vnd Ihme solcher Titul auß allen Vnserm Cantzleyen, Vnd
sonsten gegeben vnd geschriben werden, Darzü auch alle vnd Iede Ehr, Würde, Vortheil, Freyheit vnd Gerechtigkeit, wie andere Vnsere Räthe haben, vnd sich deren erfrewen, gebrauchen, nutzen vnd geniessen
soll vnd mag, Von aller männiglich Vngehindert. Iedoch soll Er dargegen Vnser gehaimb, die Ihme anvertrawt werden, biß in seine grueben züverschweigen, auch in sachen vnd geschäfften, darzü Er inß künfftig ge
braucht werden möchte, Vnß seinem guetten Verstandt nach, das beste einzhrahten, Vnserm Nutz vnd frommen befördern, allen schaden vnd nachtheil züwarnen vnd züverhüeten schuldig sein, auch sonsten in gemain alles
das Ienige thuen, leisten vnd lassen, was einem getrewen Rath gegen seinem Herrn züthuen gebühret vnd geziemet, hernach dann Vnser gnedigstes Vertrawen in seine Persohn gericht ist. Zü Vr
kundt dises Brieffs besigelt mit Vnserm Kaiser(lichen) vnd Königlichen anhangendem grössern Insigel, der geben ist in Vnserer Stadt Wien den Siebenden Tag deß Monats Octobris, nach Christi Vnsers lieben Herrn
Ad mandatum Sac(rae) C(aesareae)
Maiestatis proprium.
J. Prickhel