Wir Wenczlaw vnd Lenhart pruder Parth genant von Nicolspurg tuen chunt allen den die disen prief sehen ader
lesen horen daz wir mit wol bedachte(m) mute vnd mit gute(m) willen vnser wisen di pei dem dorfe Nicolspurg ge
legen ist di da heizet di Stokwise den Ersamen vnd den Gaistliche(n) vrawen der Ebtissin vnd dem Con
uent des closters czu sant Marien sal grabes ordens In Alten Prvne die nu sint vnd die her nach chunftic wer
den vnd dem selben closter recht vnd redleich verkauft haben vm Neun vnd cwainczik marc grozz phenning
Prag(er) muncz dier vnd sechczik grozz vor ein Igleich marc geczalt der sie vns nu mit gercitem gelde gar vnd
genczleich beczalt vnd gewert haben daz sie di selben wisen ewicleich vnd czu recht aigenschaft besiczen vnd
haben schullen In allen iren gemerken wi si gelegen ist es trag holtz ader graz mit alle(m) nucz mit alle(m) recht
vnd mit aller herschaft als si vns hat angehozt vnd sam wir si e vnz bis her gehabt haben vnd besessen
vrey vnd gemachsam an vnser vnd vns(er) geerben hindernizze ewicleichen Vnd dar vm gelob wir mit gesamt(er)
hant pei vns(er)n trawen an alle argelist den genante(n) vrawen der Ebtissin vnd dem Couent vnd dem closter
di vorgesprochen wise vor allerlai leuten von aller ansprach von allem infal vnd von allem hindernizze nach
eim lantrechte des landes czu Merhern als oft des durft geschiet von der czeit daz sie vns dar vm manen inner
den neesten vier wochen genczleich czu entwerre(n) vnd czu vreyen mit vnser selbs mu vnd mit vns(er) czerung
vnd ab ymant di selbe wisen von in abschutten wolde daz gelob wir alsam nach dem selbe(n) lantrecht czu vn
derkumen vnd czu weren Gesche aber daz daz ymant die egenante(n) vrawe(n) di Ebtissin vnd den Couent vnd
daz closter an der egesprochen wise ansprech ader in kainerhand weize irret ader hindert vnd wir des nach
eim lantrecht sam e geschriben ist nicht entwerre(n) ader ab sie ymant abschutten wolde vnd wir des nicht
mochte(n) nach eim lantrecht verwerre(n) so gelob wir in gesamt(er) hant pei vns(er)n t(r)wen an alle argelist wir paide
vderman mit eim knecht vnd mit chleim pferde czuhant in eyn reite(n) ken Prvne in di stat vnd also in eim erbern
hause wo sie vns hin weisen rechtes vnd gewonleiches inleg laiste(n) vnd nymm(er) dar aus chume(n) bis daz wir di e
genante(n) wise ab sie dar an gehind(er)t w(er)den genczleich sam wir geschrib(e)n ist gevreyen vnd entwerre(n) ader bis daz
den vorgenante(n) vrawe(n) der Ebtissin vnd dem Couent vnd dem clost(er) ab wir daz abschutte(n) nicht gewere(n) mochte(n)
ir gelt daz ist die vorgeschriben Neun vnd cwainczik marc vnd dar czu czehen marc der selbe(n) phening vnd der
val die wir in czu widwet mit gesamt(er) hant pei vns(er)n t(r)wen an alle argelist czu gebe(n) vnd czu galde gelobt gen
cleich an gepresten w(er)den beczalen vnd dor vber wer daz daz wir de(n)ne vierczehen tage also inne lege(n) vnd in
daz selbe gelt paid haubtgut vnd widwet denoch nicht genczlich v(er)golden wurde so schulle(n) sie daz selbe gelt
alles samt auf vns(er)n schade(n) neme(n) vnd aufgewinne(n) wo sie muge(n) czu e(r)sten ad(er) czu jude(n) vnd wir schulle(n) vnd ge
lobe(n) pei vns(er)n t(r)wen aus dem vorgeschriben inleg nym(mer) kume(n) bis daz sie paid haubtgutes vnd widwettes vn(d)
daran alles schadens der dar auf gegang(e)n ist daz sie redlich beweise(n) muge(n) genczlich vnd allerdincz beczalt w(er)de(n)
vnd berichtet Czu eim vrchund diser sache hab wir in disen prief gegebe(n) an den mit vns(er)m wisse(n) gehange(n)
sint vns(er) Ingsigel mit der geczeuge(n) Ingsigeln die hernach genenet sint die wir czu geczeugniz habe(n) gepeten
Vnd wir Erhart von der kunstat Czudcamer czu Prvn vnd czu Znoym Dytreich von Opran Cuder czu Prvn
Zemik von Wenige(n) Nemtzig Stepha(n) Pausch von Peimprechtsdorf Hannus vo(n) Pelwicz Powe vo(n) Polhradicz
vnd Johan von Popicz geczeuge der vorgeschriben sache habe(n) vns(er) Ingsigel an disen prief czu geczeugniz
mit vns(er)m wisse(n) lazzen henge(n) des vns die egenante(n) Wenczlaw vnd Lenhart vleizzig habn gepete(n) Diser p(r)ief
ist gegebe(n) an dem achte(n) tag des Oberste(n) tages von Cristes geburt nach dreiczehen hundert jaren in dem
Fvmfczigesten Jare