Wir fvdel von gots ains herman phago honigman nycol ebel faynd nyunga scheppen in den smyden der nach dy scheppen in
dem preghaus steffan hoffman sychel lankschenkel henman wolkensteyn Bekennen vnd tun kunt allen den dy dyzen kegen
wurtigen pryf an sehen oder horen lezen das dy Ersamen Juncvrauwen clara vnd margaret geystleyches ordens vnd in dem
kunygen closter wonhaft synt zu brvn haben eyn achteyl an der smyden dy do yst genant swthaw vnd schullen daz achteyl
haben in alle dem rechten als eyn ygleuch werkmeyster zu recht eyn achteyl eyner smyden haben schol vnd also bescheydenleuch
wenn der Egenanten Juncvrauwen eyne stirb so schol dy ander in alle dem rechten das egenant achteyl der vor genanten
smyden haben als syz vor payd gehabt haben vnd also ab das geschycht daz sy payd sturben so schol dy pryoryn vnd dy keleren
dy zu der czevt seynt czu dem egenanten achteyl recht haben als dy vorgenanten Juncvrauwen haben gehabt pey iren leben
dyzen leyb vnd schullen daz gelt daz von dem achteyl geuelt vnder dy Juncvrauwen thaylen als gewonleuch yst in dem closter
des hat dy Egenant Juncvrauw clara vnd margaret nach irem thod bescheyden der Juncvrauwen elyzabeth ir swester eyn
schok grozer alle Jar zu geben vnd ab dy Juncvrauw elyzabeth auch stirb so schol daz schok auch pleyben als syz vor
bescheyden haben Czu eyner vrkund dyser sach hab wir vor genanten scheppen vnser yngesygel an dysen pryf gehangen
eyner warheyt vnd vrkuntteyt daz ist geschen nach crystes gepurt Tausent Jar vnd dreyhundert In dem czwey vnd
sechczigisten Jar an der heyligen auffart vnsers herrn