Ich hainreich vnd ich hertneid geuettern von liechtenstain von nicolspurg Bekennen fur vns vnd all vnser
erben vnd tun kund offenleich mit dem brief menigleich gegenburttigen vnd kunftigen die den brief sehen horn
oder lesen Daz wir mit wolbedachtem mut zeittigem rat vnd vnbetwungen vns mit den erwirdigen geistleichn
frawn kachne Aptessinn / dorothee priorinn / Barbare Suppriorinn / Anne kelnerinn / hostke Custrinn / vnd dem ganze
Conuent gemainkleich der frawen kloster an der Alten Brunn Cistercer ordens vnd olmuczer Bistumbs vnd
mit allen irn nachkomen Sölher hernachgeschribner aÿnung verschribn vnd verpunden habn verschreiben vnd
verpunden vns auch der wissenleich mit dem brief / Also das all ire vnd irs egenantn Gothawz lewt die sÿ
ÿcz habn oder noch gewünnen / mit irim gut vberal auf vnsern guetern nicht sullen noch mugen von den vnsern
verpoten noch auf gehalden werden / Sunder welhe die vnsern hinz den irin icht heten zesprechen die sullen drumb
ee vor denselbn frawn oder aber auf irs gothawz guetern / ain recht von den irin nemen vnd suchen / des
gleichen ob die irin hinz den vnsern icht zesprechen hieten / die sullen auch ee vor vnser oder auf vnsern guetern
ain recht nemen vnd suchen vnd die vnsern auf derselbn frawn vnd irs gothawz guetern / wir auch nicht aufhaldn
Auch waz wandel ire lewt auf vnsern guetern verwurchen mit dem rechten sÿ sein groz oder klain / darumb sullen wir
noch vnser Amptleut vberal sÿ nicht hindern noch phrengen an leib noch an gut vnd auch derselbn wandel kains
von den irin nicht nemen / wenn sÿ dieselben wandel den obgenant frawn vnd dem gothawz verpuessen sullen / des gleichn
ob die vnsern auf irn guetern icht wandel mit dem rechten verwurchen die sullen vns die vnsern auch verpuessen
vnd auch darumb von denselbn frawn vnd irn Amptleuten nicht geprengt noch gehindert werdn an leib noch an gut /
Ausgenomen ob ir die vnsern es ween kasten oder guden icht argeit verfugen oder schaden teten an irem holz swainwachst
waid wismad vischwaid oder geiagd darumb habent sÿ vollen gewalt die vnsern die dasselb teten zepuessen swa
sÿ die ankomen nach dem als dann darumb recht ist vnd daz sol wider die obgeschribn aÿnung nicht sein / des gleichn
ob vns die irin icht argeit verfugen / oder schaden teten an vnserm holz swainwachst waid wismad vischwaid oder
geiagd / die habn wir selb auch darumb wa wir sÿ ankomen zepuessen an demselbn rechten vnd das alles so vor
geschribn steet gelobn wir mit vnsern trewn vns ewn fur vns vnd all vnser erben vnd alle die vnsern ewicleich
genczleich stet vnd vnuerrukcht zehaldn vnd darwider nicht zetun / in dhain weiz vngeuerleich vnd gebn daruber
den brief / zu ainem warn vrkund vnd ewiger gedechtnuzz versigilten mit vnser / vorgenantn hainreichs vnd
hertneids vettern von liechtenstain von nicolspurg baidn angehangn Insgiln vnd mit vnserr Stat Insgil zu
nicolspurg Der geben ist nach cristi gepurd vÿerczehen hundert jar vnd darnach in dem Aindleften Jar an sannd
Giligen tag