Wir Dorothea Eptissin Anna priorin Anna supporin Dorothea kelnarin vnd der gancze Conuent vnsers closters in dem tal vns(er) frawen
czu ossla sand Bernhardes orden in olomuczer stiftun(g) bekenne(n) offenbar mit disem kegenwortigen priff allen lewten edel vnd vnedel
geistlichen werntliche(n) furste(n) lanthe(r)n ritter(n) rittermessige(n) knappe(n) purger(n) pawer(n) auf festen in steten merckte(n) vnd dorffern dy in sehen
adir horen lesen daz wir mit wolpedochte(n) mute wille vnd gute(n) rot auch vngetwunge(n) durch nucz vnd notdorft wille vnsers obgenante(n)
closters vorkauft habe(n) dem erbern vorsichtige(n) mane Peter falkley purger czu Znaym sein geerben vnd nochkom(m)lige ewichlich vnd erbleich
vns(er) eker andirhalbe lehe(n) mit aller czugehoru(n)ge dy do vor odet vnd vorwuchst worn doru(m)b sy vns(er) halbe vnd vns(er)s closters vngebawt
vnd vngestift muste(n) sein gelege(n) do von wir kayne(n) nucz nicht hette(n) emphange(n) vnd dy selbe andirhalbe lehe(n) emol czu der mul dy an d(er) iglaw leit
in vnsern dorff an griczmas gehort habe(n) daz sy dy nucze vnd schulle(n) pawe(n) pesicze(n) auch halte(n) in rechte(n) purgrecht frei vnd ledig mit alle(n) den
rechte(n) alz wir sy pesesse(n) han mit nymat nichtes nicht czu leide(n) noch czu gebe(n) noch mit der gemayn czu griczmas adir andir ymat aus dem
lande adir in(n) lande kays(er)las gobe noch lantstewer sy wer recht ad(ir) vnrecht von wem adir welchem hamptmane in ader aus dem lande geaist
adir gefordert wurde adir gepote(n) an neme(n) ab dor vber imat is wer gewaltige hant adir wer her wer alz ee gemelt ist wolde dem
ee genante(n) Peter falkle seine(n) geerbe(n) vnde nochkom(m)lige(n) czu nste mute vnd twinge(n) czu leide(n) in kaynlay sache anders wen ee geschribe(n) stet is
wer mit geistliche(n) adir werntliche(n) rechte do von vorhais(s) wir in sein geerbe vnd nochkom(m)lige czu pringe(n) vnd czu ledige(n) mit vnsern trewen
vnd krasft dises priffes an alle sein sein geerbe vnd nochkom(m)lige schede Abir doch in sulcher mos(s)e ausgenom(m)e(n) daz d(er) obgemelte Peter
falkel sein geerbe vnd nochkom(m)e(n) vns schol vnd schulle(n) czinse(n) czins raiche(n) vnd gebe(n) von den obgemelte(n) andirhalbe(n) lehe(n) virczig grosse
prag(er) muncz adir klaine gelt wo daz genk hat in dem lande hy czu merhern alle ior ierlich ye auf sand Gerge tag miteinande(r)
vnvorzogelich Auch geb(e) wir dem oftgenante(n) Peter falklei seine(n) geerbe(n) nochkom(m)lige(n) volle gewalt mit krasft dises priffes dy andir
halbe lehe(n) czu vorkauffen vorwechseln czu vorsetczen mit enandir adir pey czwainczige(n) gewante(n) alz oft in gut dunket sein geer
ben auch nochkom(m)e(n) vnd sy noch seine(n) irem nucz vnd frum(m) czu genisse(n) mit alle(n) den rechte(n) alz in dem priff oben geschribe(n) stet Auch
wer sy den von im seine(n) geerben nochkom(m)lige(n) kaufft adir kaufte her wer wer er wer man adir frawe geistlich adir wert
lich dy schullen dy andirhalbe lehe(n) mit enander adir pei czwainczige(n) gewanten pesiczen vnd halden mit ganczem rechte(n) alz
oben geschribe(n) ist abir an vorczinisse vnd widersprechen vnsers czinses alz ee gemelt vnd geschribe(n) stet Vnd des czu ainer
ewigen vnd stete(n) geczeugnus auch sicherhait der obgeschribe(n) sache hab(e) wir vnser Ingesigil dy wir derkome(n) an disen priff
an gehangen der do geschribe(n) vnd gegeben ist in vnsern obgenante(n) closter czu ossla noch cristi gepurd thausent iar
virhundert iar vnd in dem aleften iar an den nesten freitag noch sand philip vnd Jacobs tag