Wir Låslaw von gots gnaden zu Hungern zu Behem etc(etera) Kunig, Herczog ze Osterreich, vnd marggraff ze merhern etc(etera)
Bekennen vnd tun kundt offenlich mit dem brief, Daz wir angesehn haben die willigen getrewen dienst, die vns getrew
Jan morawa vnser diener, gesessen in vnser Stat ze Brünn, weilent dem Allerdurchleuchtigisten fursten kunig Albrechten,
Romischen, zu hungern, ze Behem etc(etera) kunig, Herczogen ze Osterreich, vnserm lieben hern vnd vatter seligen getan hat,
vnd vns die auch hinfur tun sol vnd mag, vnd In, vnd die erbern Dorothen sein hausfrawn, von sundern gnaden,
vnd furstlicher macht, als marggraf ze merhern, gefreyt haben, wissentlich in krafft des briefs daz si in vnser egenantn
Stat ze Brünn, mit Irem gut, alle die freyheit, gerechtigkeit, vnd Burgrecht haben, niessen vnd geprauchen sullen vnd
mügen, die ander vnser Burger daselbs zu Brünn habent vnd niessent, Also daz si beüde miteinmander, oder welhes das
ander vberlebt, Ir lebteg, ains yeden Jars, für die gewondliche losung, fur wacht, zirken, torrhütten, vnd fur all ander
vordrung, zehen vngrisch gulden oder Ducaten, oder souil phennig dafur, als dann ye zu zeiten der gulden gelten wirt,
funff zu sant Jörgen tag, vnd funff gulden zu sant michels tag, oder souil phennig dafur, als oben gemelt ist,
geben sullen, vnd was das mer, vber die obgemeltn zehen gulden derselbn losung vnd ander mitleiden bringt, die
dieselb morawa vnd sein hausfraw phlichtig wärn zegeben, haben wir In die gnad getan, daz wir dieselb vbermass
den vorgenantn vnsern Burgern, ains yeden Jars, an vnserm kamzins, den si vns Jerlich geben sullen, genediclich
abziehen vnd abgeen lassen wellen angenuerd, Daruon gepietten wir den erbern weisen, vnsern lieben getrewen, dem
Burgmaister, Richte, Rate, vnd den Burgern gemeinichlich zu Brünn, yeczgenwirtign vnd kunftign, bei vnsern gnaden
vnd hulden ernstlich vnd wellen, daz si die bemelten eelewt, bei disen vnsern gnaden vnd freyheyten, Ir lebtege, auf die
obgemelt Ir verwilligung genczlich beleiben lassen, wann wir In die vbermass an vnserm kamzins Jerlich abziehen
wellen, als vor beruert ist, vnd si dawider nicht beswern noch bekumern in dhain weg vngenendich, mit vrkund des
briefs, der geben ist zu prag an Sontag nachst nach sand pauls tag Conuersionis, Nach Cristi gepurd Tausent,
vierhundert vnd in dem Vierundfunfczigistn Jare, vnser Reich des vngrischen etc(etera) Im dreizehendn, vnd des
Behemischen Im ersten Jare.

Ladislaus Rex
manu p(ro)p(ri)a

Ad mandatum d(omi)ni Regis
Jo(hannes) p(rae)po(situs) b(ea)te m(ariae) t(em)p(o)re resid(ens)