Van diser wlt chrancher sin vnstæt ist vnd d(er) leut gedæchtnusse slupfich zu aller tzeit vnd zergenckleich an allen dingen So ist daz pilleich vnd recht vnd gewændleich vnd auch
erw(er) vnd nutzleich daz man d(er) leut gescheft vnd ier tat ewigen vnd vesten sol mit vrum(er) leut getzeugnusse vnd mit d(er) schrift vrchund Also daz dar nach furbaz nimmerm(er) chain
tzweivel noch dehain ierrsal icht auf erste Dar vmb so pitte ich ees alle di leut di nu lebent od(er) hi nach chunftich sint den disen schrift gechundet wiert daz sei sehent od(er) horent lesen
disen brief Daz si des gedenchen vnd getzeug sein daz ich Katrey weiln hausvrow des erw(er)n h(er)ren h(er)n Tazen von lompnitz dem got genædich sei pei meinen guten witzen mit gesunde(m)
leib mit willen vnd mit rat mein(er) lieben erben Agnæten meines sunes vnd pentzen meines enenchtleins vnd anderr meiner vreunt ein chlost(er) gestift han vor d(er) stat ze
Brün mit helf meines lieben h(er)ren Johanes des edeln chuniges vb(er) Behem vnd vb(er) polan lant vnd mein(er) lieben vrowen d(er) chunigin Elsen di mier di stat vnd daz erbe gege
ben habent da ich daz chlost(er) gebaun han da si di ersten vnd di obristen stiftær sint Daz chlost(er) han ich gebaun zu eren vnd zu lob vnsers h(er)ren Jesu christi vnd sein(er) tzarten
muet(er) mein(er) vrowen sant marien vnd allen gotes heiligen Daz man weihen sol in dem namen mein(er) vrowen sant Annen d(er) himelischen chunigin muet(er) nach d(er) sol daz
chlost(er) genant sein ewichleich Dem chlost(er) han ich gegeben daz guet vnd daz erb als iz hi nach geschriben stet zu trost vnd zu helf mein(er) sel vnd aller d(er) sel von danne daz
guet ie chomen ist Daz vorgenant chlost(er) vnd daz guet vnd daz erb daz ich dar zue gegeben han vnd alles daz guet daz hi nach dem chlost(er) gegeben vnd gechouft
wiert Daz enpfilich ich vnd gib iz in den scherm vnd in di voytei d(er) obristen stiftær meines lieben h(er)ren des chuniges vnd d(er) chuniginne di nu lebent vnd alle ierr
nach chunft Dar nach in den scherm vnd in di voytei des lieben pischolf Chuenrades von Olomütz d(er) nu lebt vnd in aller d(er) pischolf scherm ewichleichen di hi nach
chunftich sint also daz si daz vnd sten vnd w(er)n schullen daz mit des vorgenanten chlost(er)s guet vnd mit seinem erb di predig(er) prued(er) d(er) p(ri)or p(ro)vincial p(ri)or od(er) wi si
genant sint nicht zeschaffen schullen haben noch gewaltich sein nur also vil nach geistleichen dingen als den seln zue gehoert vnd sol ier dehain d(er) predig(er) prued(er) vor dem
chlost(er) noch auf des chlost(er)s erb nimm(er) gesitzen mit stætem wesen Iz sol auch niemen mit den vrowen in dem vorgenanten chlost(er) capitel haben wenn d(er) obrist(er) p(ri)or des
ordens od(er) des maist(er)s vicarius od(er) p(ro)vincial des landes Iz schullen auch di vorgenanten prued(er) in daz chlost(er) noch dar auz dehain vrowen noch iunchvrowen geistleich
noch w(er)ltleich senden noch geben iz sei denn gemain aller d(er) vrowen wille di zu den zeiten in dem conuent lebent Ditz ist daz guet vnd daz erb daz ich dem chloster
gegeben han daz mich an erbet van meinem vat(er) vnd mein(er) muet(er) vnd von meinen zwain swest(er)n den got genad Gedrauten vnd Annan vnd daz ich in recht(er) gewer
hi pracht han Des ersten di lehenschaft zwayer kchirchen di ain zu vrsichaw di and(er) zu schutwaritz mit den widem vnd mit alle dem guet vnd nutz d(er) dar zue gehoert daz
di vrowen in dem vorgenanten chlost(er) di kchirchen baideu leihen vnd nutzen schullen vnd besetzen nach ier eren vnd nach ierem vrumen ewichleich vnd zway halbeu dorf
Sibtitz vnd daz grozz Blaywitz vnd alles daz recht vnd di ansprach di ich auf daz and(er) halptail d(er) zwayer vorgenanten doerffer han als si mein swest(er) Gedraut an mich ge
erbet hat vnd mier sei auf gegeben hat bei ierem lebentigen leib als ich iz oft in d(er) tzaud(er) ge vrchundet han nach landes recht Ich han auch in gegeben daz wenig
Blaywitz Allezsant vnd alles daz ich dem chlost(er) gegeben han daz han ich im gegeben mit holtz mit ekchern mit weingärten mit wismat mit wayd iz sei æd od(er) ge
stift wie so iz genant sei ewichleich an alle arge liste Dar vb(er) han ich dem selben chlost(er) gegeben daz minn(er) Orlechaw in alle dem recht vnd ich di vorgenanten doerff(er)
dem chlost(er) gegeben han doch auzgenomenchleich mit solh(er) beschaidenhait ob di iuchvrowe Katrey mein eningchel beleibt in dem chlost(er) vntz an ieren tot chunt
ab(er) iz also daz si nach ierr besten vreunt rat wold nemen einen man ee si gehorsam tæt vnd bestætigt wuerd zu dem orden so schullen di vrowen di zu den
zeiten lebent in dem chlost(er) d(er) iunchvrowen katreyn setzen zu pfant daz dorf fuer hund(er)t march silbers fuer isleich march vier vnd sechtzig grozzer pfenig
vnd daz schullen di vorgenanten vrowen von ier læsen wenn si mugen wold ab(er) si in ein and(er) chlost(er) varn od(er) in einen and(er)n orden so stet iz an meinen
genaden vnd an d(er) vrowen genaden di zu den zeiten in dem oft genanten chlost(er) lebent ob si d(er) iunchvrowen icht wellen geben Ich Margret di
iunge Tazzin gotes dienærin in dem selben chlost(er) bechenne des an disem brief daz ich dem vorgenanten chlost(er) gegeben han willichleich daz dorf
daz da haizzet Huesitz nahen bei dem Aychorns daz mein morgengab ist gewesen von meinem lieben wiert dem got genad dem iungen Tazen des
morgengab waz iz von sein(er) ersten hausvrowen Ofmein weiln h(er)n Gerhartz tocht(er) von Oblezz mit alle dem daz dar zue gehoert Ich gib auch dem chlost(er)
dreu lehen datz Stuitz in dem dorffe mit alle dem recht als ich seu gechouft han vmb di pfenning di inier weiln h(er)tzog Albrecht von Oestreich gab
zu meinem wiert dem iungen Tazen dem got genad Disen brief han ich katrei gegeben zu ein(er) vrchunde vnd zu ein(er) gewissen getzeugnusse d(er)
vorgeschriben sach vsigelt mit meinem infigel vnd mit anderr edeln h(er)ren infigel d(er) nam hi nach geschriben stet mit h(er)n Jeschken von
Bozerietisch h(er)n Ziwischs von sternb(er)ch h(er)n woytiechs von Gedlaw h(er)n Milutschs von Namieschisch h(er)n witigen von d(er) Lutich h(er)n vlreichs
von Lompnitz Diser brief ist gegeben do von christes gepuerd warn dreutzehenhund(er)t iar dar nach in dem sibentzehenten iar