Ich Nicklasch krepiger vnd Barbara sein Eliche hawsfraw mit vnsern erben vnd nachkome bekenne mit diesem
prieff das wir von grosser not die vns darzu gedrungen hat redlich vnd rechtlich vkawfft habn vnd mit der gegen
wirt vkawffen ain mark groschen phennig Meherischer zal vnd werung wares gerechtes vn plosses Jarlichs zinse
vmb zehen mark groschen vorgemelter munse vnd zal den erwirdige vnd got der geben Juckfrawen swester Elizabeth
krapffin die zeit porin vnd dem ganzen couent des klosters vnser lieben frawen zu swester herbrig in der stat Brunn auff vnser
haws vnd garten mit seiner zu gehorung Auff der bemelten Juckfrawen meiner genedige herschafft grunt auff der Newe
gassen gelege zwischen des Nicklas vnger zu der ain seitte vnd wenczlab goat zu der ander seitten vnd denn auff
den nagstkunfftigen zu weynachte an zu heben ain halbe mark groschen phennig vnd darnach zu sand Cirilli et me
tudii tag auch ain halbe mark groschen phennig vn hyn fur alle jar Jarlich all mall auff die bestimbte tag zu raiche
vnd zu zinsen gancz frey vnd an alle purd vns auff legund vnd ob wir das nit tätten do got for sey so sol denn die
vor bemelten erwirdigen swester Elizabeth porin vnd der gancz couent ganczen vnd volkome gewalt habn solichen
vsawmptn vnd vnbeczalten zinse erfordern vnd auf pringen auff vnser schaden an allen widerstand geistlichs oder
weltlichs rechtens vnd so wir wellen vnd vns das geluck fuegt mug wir den bemelten zinse ain mark mit zehen
mark groschen bestimbter munse vnd zal wider vmb ablossen vnd abkawffen mit sambt dem vsessen zinse auff die
zeit gepurud gancz bezallund dem allen zu warm vrkundt vnd geugtnuss habn wir gepetten die erbern vnd weise
herrn Paul lesttawe vn her hannse leb payde purger zu Brunn ir insugil an disen prieff habn lassen hengen
doch in vnd iren erben an schaden geben zu Brunn Am Montag nach letare in der fasten Nach xpi gepurt tawsent
vierhundert vnd in dem ainvnd Newnczigisten Jar