Ich Jörg Postkopff vn(d) frowicka sein Eliche hawsfraw mit vnsern erben vnd nachkome(n) bekenne(n) mit disem brieff das wir von grosser not
die vns darzu gedrungen hat redlich vn(d) rechtlich verkaufft habn vnd mit der gegenwurt verkauffen ain halbe Marck groschen phenning
Meherischer zal vnd werung wares gerechtes vnd plosses jerlichs zins vmb funff Mark groschen vor gemelter Munse vnd zal den er
wirdigen vnd got dergeben frawen frawen Elizabeth Eptissin die zeit priorin vnd dem ganzen couent des kloster vnser lieben frawen
zu frawen herberg in der stat Brün auff vnserm hawss vnd ain garten mit seiner zugehorung auff der bemelten stat frawen meiner
genedign herschafft grunt auff der Newen gassen gelegen zwischen des Menat zystler zu der ain seitte vnd Thoma salck zu der andern
seitten vnd dem auff den Negstkunfftign Cirilli et Metudii tag an zu hebn ain halbe Mark groschen phenning vnd hin fur alle jar
jerlich all mal auff den bestimbte tag zu raichen vn(d) zu zinsen gancz frey vnd an alle pürd vns auff legnd vnd ob wir das nit tetten
do got vor sey so sol dem die vor bemelte erwirdige frawen Elizabeth priorin vnd der gancz couent gancze vn(d) volkome(n) gewalt habn
soliche v(er)sawmptn vn(d) vnbeczaltn zinse erfordern vn(d) aussprengn auff vnser schede an allen widerstandt geistlichs oder weltlichs rechs
lang vnd so wir wellen vn(d) vns das geluck fuegt mug wir den bemelte(n) zinse ain halbe Marck mit funff Marck groschen bestimbter
muense vnd zal widerumb ablossen vnd abkauffn mit sampt dem v(er)sessen zinse auff die zeit gepur(n)d gancz bezallund dem allen zu warem
urkunde vnd zeugknusse habn wir gepetn die erbern vnd weisen herrn Paul lestkner vn(d) her hannse leb payd purger zu Brün
yr insygil an disen brieff habn lassen hengen doch in vnd yrn erben an schadn Gebn zu Brün am Montag Nach letare in der faste(n)
nach xpi gepurdt tausent vierhundert vn(d) in dem ain vnd Newnczigistn Jare