Ich Hans Vnger vnd Dorothea mein Eliche hawsfraw mit Vnsern Erbn vnd Nachkomenn
bekenne mit disem prieff das wir von grosser not die vns darzwo gedrungen hat stetlich vnd rechtlich
verkauft habn vnd mit d(er) gegenwrt vakauffn ain halbe marck phennig Meherischer zal vnd werung
wares gerechtes vnd plosses Jarlichs zinss vmb funff marck groschn vor gemelt Muntz vnd zal den Erwir
digen vnd got der gebn Junckfrawen Swest(er) Magdalena thesserin die zeit porin vnd dem gantzn quent des
klosters vnser liebn frawen zwo swest(er) herburg In der stat Prunn auff vnsern haus mit sein zu gehorung
auff der bemelten Junckfrawen mein genedigen herschafft grund auff der swaby gasse gelegn zwischenn
des Nyclasch falckenhawer zu der ain seiten vnd wernusch smiede zwo der andern seitn vnd den auff den
nagstkunfftign sand dionisy tag an zu hebn ain halbe marck groschn phennig vnd hin fur alle Jare
Jarlich all mal auff den bestymbtn tag zu raichn vnd zu zinsn gantz frey vnd an alle purd vns auff
legund vnd ob wir das nit tetn do got for sey So sol den die vor bemelten Erwirdigen swest(er) mag
dalena porin vnd der gantz quent gantzn vnd volkome gewalt habn solichn vesaumbten vnd vnbe
zaltn zinss erfodern vnd auß pringen auff vnser schedn an alln wider standt geystlichs od(er) weltlichs rech
tens vnd so wir welln vnd vns das geluck fuegt Mug wir den bemelten zinss ain halbe marck
groschn phennig mit funff marckn groschn bestymter muntz vnd zal wider vmb ablosn vnd ab
kauffen mit sambt dem veseßn zinss auff die zeit gepurund gantz bezallnd Dem allem zu warn vr
kund vnd zeugnuss habn wir gepetn die erbern vnd weysn hern Vrbann kursner vnd wernusch
smidt payd purger zu Prunn Ir Insigel an disen prieff habn lassn hengen doch In vnd Irn er
bn an schadn Gebn zu Prunn an sandt dionisy tag Nach Cristi gepurdt Tausent vierzhun
dert vnd In dem drey vnd Newnczigistn Jar :