Ich Vlasko Vnd Magdalena sein eliche hawsfraw gesessn auff der Swabngassn Bekennen fuer vns vnd fur vnser erbn vnd nachkomen
mit dissem brieff das wir von wistn grosser nött die vns darzw betwungen hat Redlich vnd rechtlich verkaufft habn vnd mit der gegen
wurttigen geschrifft verkauffn xvij grosschn pfenig margkrischr munss zall vnd werung wares gerechs vnd ploss ierlichs zynss vmb
iij margk grosschn vorbemelter munss vnd zall den Erwirdign vnd gotdergebn Junckfrawn Swester magdalene thessin die zeit priorin
Vnd dem couent des klosters vnser frawen zw swester herburg In der stat brunn Auff vnser hawss mit seiner zugehorung Auff der vorbemelttn
priorin Vnd couent meiner genadign herschafft grunt Auff der vorbemelttn Swabngassn gelegn zwischn des martine auff ainer seittn vnd
Steffko auff der andern seittn Vnd auff den nagstkunffttign mantag nach des heilign drey neweniar an zuhebn xvij gl d zw zynssen Vnd
hynfur alle iar ierlich alle mall Auff den bestymbttn tag zw raichn vnd zw zynssn gancz frey vnd alle pund vns auff liegund Vnd ob wir
das nicht tetten do got vorsey So solln den die vorbemelttn erwirdign priorin vnd couent ganczn vnd wlkomen gwalt habn solichen
versawmbttn vnd vnbezalttn zynss erfodern vnd aussenigen auff vnser schadn an allen widerstand geistlichs vnd weltlichs rechtns
Vnd so wir welln vnd vns das gluck fuegt Mugn wir den bemelttn zynss xvij gl d mit iij margk grosschn bestymbt munss vnd
zall wider vmb ablosn vnd abkauffn mit sambt dem versessn zynss auff die zeit gepuerund gancz bezallund dem allen zw
warer vrkundt vnd sicherhait habn wir gepettn die erbern vnd weyssn herrn wenzel koker vnd stephan hasttko payd purg
zw brunn das sye ir payder Insegl an disshn brieff habn lassn hengn doch In vnd yern erbn an schadn Gebn zw Brunn am
Montag nach dem newen Iar nach crist gepurdt Tawsent fierhundert Vnd In dem sybenvndnewnczigistn Iarz