Wir Berusch die czeit priorin vnd der gancze conuent des closters zu vnser liben frawen sand Marie das
clostercherberg in der stat zu Brvnne bekennen offenbar vnd tuen kvnd mit dem brif allen lewten das wir
mit wolbedachtem mut mit gunst vnd mit erlawbung der erbern weisen hren die czeit richter vnd gesworn schep=
fen burger da selbs zu Brvnne vnser vnd des obgenan(ten) closters furmvnd vnd forsteher durch grosser erhafter
not willen vnd auch durch des pesten willen des selben closters recht vnd redlich forkawft haben vnd mit
disem kegenwurtigen brif forkawffen dem michelln genant Mächler kathrein seiner hawsfrawen vnd irn
vier kyndern mit namen dem erhen dem erharder dem andren vnd der chvnegunden vnsern mairhoff
zu nidir Jerspicz gelegen mit aller seyner zu gehorung paid zu veld vnd zu dorff mit alle den rechten vnd
in aller der weis sam wir in in besiczung vnd in herschaft vnzer her vnd das obgenant closter gehabt haben
zu irn sechs leiben vnd die weil sy lebent von aym auf das ander also beschaidenlich das sy es getrewlich
sam sy vns vnd den obgenan(ten) burgern gelobt haben bey irn trewn vnd bey irn eren den selben hoff zu veld vnd
zu dorff pawen pessern vnd zu fruchten brengen wollen vnd sollen von tag zu tag vnd von iar zu iar so
sy am pesten kvnnen vnd mvgen vnd sullen vns vnd dem obgenan(ten) closter von dem selben hoff alle Iar ierlich
zinsen vnden vnd geben vier mark grosser pfennig vnd acht gross prag(er) mvns vnd wechensch ael vnd vier hvner
auf sand michells tag vnuerzogndich vnd bræch sy das sarment so hab wir vollen gewalt das wir den selben
den selben hoff adr anderswo wo sy das habent mit pfenden vnd mit vf halden vnd wann dann got wil das
sy von dir werlt schaiden schullen so sal der obgenant hoff mit aller sein zu gehorung mit allen sein rechten vnd
mit alle dem das man dar ynne vinden wirt vbr clain vnd vbr gros nach irn sechser tod widr gevallen an vns
vnd an das obgenan(t) closter lediclich vnd freileichen an alle widrsprvch gaistlichs vnd werntlichs gerichtes
mit vrkvnd dicz brifs vorsigellt mit vnsern der priorin vnd des conuents anhangnden Infigeln Nach crists ge
purd dreiczehenhvndert Iar vnd darnach in dem sechs vnd newnczigistm Iar an sand pawlls tag conuersion