Ich waczlaw genant Prugmar vnd mein Hawsfraw dorothea gesezzen auf d(er) Owalengassen bekenn(en) offenleich mit kraft dicz priefes allen lewten
die in sehn od(er) lezen horn das wir d(ur)ch notdurft willen vnd auch mit rat vnd wissen H(er)rn Stephan genant Ecker Compt(ur)s in d(er)
alden Prunn entlehent vnd genome(n) hab(en) funff mark prunner zal vnd mwncz fur yde mark fircz(ig) vnd sechtzig grossen an rawb(er)n lhon
d(er) erbwrdigen iunkfrawen genant aynes(er)n phyb(er)n smids tocht(er) auch iro prunn d(er) got sponn in dem clost(er) czu vnser(er) liebn frawen i(n) prunn
hat do iro schol ich vorgenant waczlaw iarlich(er) zinsen alle iar ein halbe mark auch prunn(er) zal vnd mwncz vnu(er)czogenlich an de(m)
suntag genant d(er) pallmtag an all(es) sawmnuz w(er)cz(e)n od(er) w(er)d(e)n d(er) obgeschriben erbwrdige(n) iunkfrawen aynes(er)n sponn als vorsteit
geschriben ob des nicht geschech do got fur sei So schol vnd mag die obgenant erbwrdig(e) iunkfraw ir(e)n zinsen awb neme(n) vnd awb
pringen hincz vnden od(er) ob(e)n auf alle mein schaden vnd da wid(er) schol obgeschriben waczlaw ieden noch sprech(e)n pey meine(n) guten
vnd gancze(n) trewen Vnd fur die obgeschriben funff mark isecz ich oft geschriben waczlaw Prugmar vnd mein Hawsfraw dorothea
d(er) oft genante(n) iunkfrawen maruss(er)n sponn all(er)n firtail weingarten die ich hab in dem gepirg(e) ligend czu prunn ains gelegen
in dem aynsperk neben dem Erban man(n) genant Stephan prenhaller / czu d(er) and(er)n seiten neben dem felhalber das ist
das erste firtail das and(er) ist gelegen in dem perk genant Pzner pei dem erban(n) man Jan pass(er) slerar genant czu d(er) and(er)n
seit(e)n tuchmach(er) die selben weingart(e)n schull(e)n sein g(e)wisl vnd phant fur mich waczlaw vnd fur mein Hawsfraw dorothea
der wil geschriben iunkfrawen maruss(er)n sponn czu nucz(e)n des closters als ob(e)n geschriben stet Vnd als awb genome(n) ob sach(e) wer
das mich waczlaw vnd mein Hawsfraw got gebt od(er) pfenning wurd das die oft geschriben funff mark nicht geb(e)n vnd ab=
ffert(e)n d(er) wol genante(n) erbwrdigen iunkfrawen maruss(er)n So schol si mir vnd mein Hawsfrawen vnser(n) prieff wid(er) geb(e)n an
alles w(er)cz(e)n sawmpnus vnd wid(er)red vnd vor disen prief hab(e)n wirt mit willen d(er) erbwrdigen iunkfrawen maruss(er)n
d(er) hat vnd schol hab(e)n gwalt macht vnd kraft czu allen den sach(e)n die diser prieff lawt als si selb(er) d(er) sach(e) all(e)n czewer
pestatigung vnd sich(er)hait hab ich waczlaw vnd mein Hawsfraw dorothea gepet(e)n d(e)n Erbwrdigen man H(er)r Stephan
genant Ecker die selbige czeit Compt(ur) vnd schicz(er) des Crelichofes in d(er) alden prunn das er sein inhsigl gehangen hat an disen
gegenwrtige(n) prief das er hat getan im vnd seyn(e)m orden an schaden der gegeb(e)n ist in alden prunn auf d(er) crebzgassen den
nachsten montag nach dem pallmtage nach cristi gepurt Tawsent firczhundert iar darnach in dem drein vnd fircz(ig)st(e)n iar