WJch Eucharius Horst auf Barenaw der Röm(ischen) Kay(serlichen) May(estät) Rath, bestelter Haubt
man, Bekhenne vnnd Vrkundte hiermit diser Quittung vor Jedermänigkhlich Für mich meine Erben vnnd Nachkhommen, Demnach Jch im Nammen vnnd an Statt, Als weillandt deß Hochwürdigen Wolgebornen Herrn, Herrn Ha,
nibaly vonn vnnd zue Schawenburg, Herrn auf Mährenberg, Hinderitz, vnnd Schirchling, Pfandt Jnhabern baider Herrschafften, Waischen, vnnd Liechtenstain, Sanct Joann ordens Ritteren, Röm(ischer) Kay(serlicher) May(estät) Mährischer Kriegs
Raths, Cämmerers, Bestelten obristen, vnnd General Wachtmaisterer, Seeligister gedächtnuß, vnnd deß von Jme gantzen Regiments, hochen Beuelchs habern, Beuollmächtigter, derer halben Erb: vnnd Aigenthümbliches
Guet Krzowitz, nebst allen Nutzungen vnnd Zuegehörungen, dem Edlen vnnd Gestrengen Herrn Walthärn vonn Müllerszdorffern, vonn Lebeyr, Röm(ischer) Kay(serlicher) May(estät) Mährischer Cammer Herrn, seinen Erben, vnnd Nachkhommen, ver
mög aines ordentlichen Cäuff: verschriben Brieffs, gerichtlichen vnnd rechts: Acten Einuerleibt, deß von Datum im Jahr Christi Sechtzehenhundert Neünn vnnd Zwaintzigisten Jahrs, dem Achten May,
vmb ain gewiße Summa Geldes, Nemblichen Achtzehen Tausent Fünffhundert gulden Rheinisch Jeden Zue Sechtzig Creützer gerechnet, Sambt Hundert Ducatten Leykhauff verkaufft,
Da Jch vonn wolgedachten Herrn Müllerszdorffern, der obgedachten Summa geldes Achtzehen Tausent Fünffhundert gulden Rheinisch, wie auch bemelte Hundert Ducaten Leykhauffs, ferner bey
bezahlung aines Rauffschillings, im Nammen vnnd an Statt gedachter meiner Herrn Principaln allenthalben Zuefriden vnnd völlig Contentiert, vnnd befridigt worden, Welcher Gestaldt, daß weder Jch Als Beuollmächtig
ter für mich selbsten, auch meine Erben, noch wolgedachte meine Herrn Principaln, vnnd Jhre Erben, vonn wolernanntem Herrn Walthärn Müllerszdorffern vonn Lebeyr, noch seinen Erben vnnd Nachkhommen, von
Jetz, noch ins Khünfftig nichts Weitters Zue fordern, noch Zuesprechen haben, Sonndern dieselben, Crafft diser Quittung für Alle Ansprüch: vnnd Ahnsorderungen, bemelten verkaufften Guets Krzowitz
halben im besten Formb vnnd weise, wie es in disem Löblichen Marggraffthumb Mähren, am besten, vnnd beständigisten sein vll, Khann: oder mag, hiemit gantz: vnnd Völliglich Quittiern, Frey, Ledig: vnnd Loß
sprechen, Alles getreülich vnnd ohne gefärde, Zue merer dessen bescheinung habe Jch dise Quittung mit meinem angeborenem Jnsigl, neben aignen vnnderschribnem handtschrifft beuestiget, vnnd bekräfftiget,
vnnd benebens die wolEdlen vnnd Gestrengen Herrn, Herrn Andream vonn Ostersen auf Dürßewitz, Röm(ischer) Kay(serlicher) May(estät) wie auch Jhrer Hochfürstlichen Gnaden, Herrn, Herrn Cardinalen vnnd Fürsten, dem
die Mährische Rath p. Herrn Tobiam Allman vonn Allmstain, Röm(ischer) Kleineren Rechts Officierern im Marggraffthumb Mähren, erbetten, das dieselben, vmb noch mererer glaubwürdigkhait, Jhre Jnsiglen hier
vnnd Händt Vnderschrifften (Jedoch denselben vnnd Jhen Erben ohne ainzig Nachtheill vnnd Schaden) hierunder gestelt. Beschehen Am Sanct Michaels Tag, Nach Christi vnsers Erlösers vnnd See,
ligmachers Allerheylligisten Geburths Tag, Jm Sechtzehenhundert Vier vnnd dreyssigisten Jahr.