Wir Anna fraw zu der czeit Eptissin zu vnser liben frawen zu Znoym Helena vicaria vnd katherina Gerharts tochter kemmerin vnd der gancz conuent sand
claren orden derkennen vnd tun kund offenlich mit disem brief wer In list oder horet lesen die nu leben vnd hin fur kunftig sein das der beschaiden man meyst(er)
hanns mit ander fromen lewten fur vns kumen ist vnd habent vns gepetn das wir In lassen auf vnser gemein zu hodnicz ein myl pauen auf dem wasser
das do heyst weyger czwoy rad mit czweyn myl hewsern das haben wir getan nach rat frumer lewt vnd haben Im heyssen ausgen vnser amechtlewt die weyt
vnd dy leng auf peyden hofmarchen vnd haben sein hewsen marchstain dorauf seczen auf alle ekke vnd auch hab wir Im gegeben eyn teyl vnsers ackers In der
aw nahet pey der tay das selbig auch aus gesteint auf alle ekke das der vorgen(ant) meyst(er) hanns vnd sein hawsfraw katherina vnd all sein nachkumen nicht ver
rer schollen greyfen pey vnsern hulden vnd Im auch nymat yerrung vnserthalben dar yn tun schol wenn er das selbig erb nyczen schol vnd sein nachku
men mit vorkawfen mit verwechsleyn mit vsegen an yerrung vnsers czins den er vnd sein nachkumen vns yerikleych raychen schol albeg zu sand michele tag
vierczig meczen korn vnd do mit eygens recht leczen alz des lands lawf ist vnd die land stewr wen dy gemeynkleich in dem land kumt die schol er vns
raychen vnd geben als von eynem ganczen lehen verrer schol er robot weysheyt vnd aller ander gab von vns vberhaben sein von dem vorgenan(ten) gut
vnd auch mit solicher bescheydenheyt das der vorgen(ant) meister hanns vnd sein nachkumen das wasser schollen wieren vnd leyten In zu nucz alz myl recht
ist an yrrung vnd auch er das wasser der gemeyn nicht weren schol vnd yren viech was sy des durffen zu trenken von end zu ende ausgenomen auch
ist beredt wardn wenn des not geschiht den lewten zu malen so schol meyst(er) hans vnser lewt von hodnicz vnd von taswicz fur ander lewt vnd nach pawrn
furdrn vmb ein gwondliche mawt an beswerung Auch schol meyst(er) hanns des wassers nicht wern den lewten die do siczen In winkl do der pryel
nicht hin mag gelengen zu eilhafter not alz zu pauen oder zu mawt(en) auf cwo oder drey stund vnd er den andrn das wasser bryel mit ir hilf in das
dorf schol laytten Vnd wer den prief wirdt in haben mit des meister hanns guten willen oder seiner nachkumen der hat als gut recht zu den ob
geschriben sachen als sy selber vnd des zu eyner ganczen vrkund vnd sicherheit geb wir Im den prief an dem wir vnsre Insigel mit vnserm guten
wissen vnd willen haben gehangen der gegeben ist nach xpi gepurd vierczechen hundert Iar vnd dornach In fumf vnd czweynczigisten Iaren an
dem tag des liben sand Augustini des heiligen lerers