Wir Leopold von Gottes gnaden Erwöhlter Römischer Kaiser
zue allen Zeiten Mehrer des Reichs, in Germanien, zue Hungarn, Böheimb, Dalmatien, Croatien vndt Sclavonien, König, Ertzhertzog zue Osterreich
Marggraff zue Mähren, Hertzog zue Lützemburg, vndt in Schlesien, vndt Marggraff zue Laußnitz. Bekhennen offentlich mit disem brieff, vndt thuen khundt allermänniglich: Wie
wohl Wir auß Römisch: kaiser: vndt Königlicher höhe vndt Würde, darein vnß Gott der Allmächtige gesetzet, auch angeborener gütte vndt miltigkheit, iederzeit genaigt sein, aller vndt ieder vn
serer gehorsamben, vndt getreuen Vnderthanen ehr, nutz, auffnembung vndt bestes zuebefördern. So bindt Vns doch billich mehr gewogen denen ienigen, so sich gegen vns, vndt Vnserm Hochlöblichen
Ertzhaus Osterreich vor andern mit getreuen diensten in standthafftiger, vndt eyfferiger devotion vnwethig meritirt gemacht, mit Vnserm kais: vndt Königlichen gnaden zuebegegnen.
Wann Wir nun gnädigst angesehen, vndt betracht haben, die guete qualitetn, vernunfft, vndt geschickligkheit, deren vnß der Vndertänige, Andächtige, Vns besundergeliebte, Thomaß von Clesin, die er
vndt mit dem Creutz vndt rothen Stern, so deß zue Pöltenberg bey Znaimb in Vnserm Erb Marggraffthumb Mähren, vilfältig gerühmet wordn, Insonderheit aber zue kaiser: vndt Königlichen gemüeth
gezogen, was massen Er nunmehr in das Zwanzigste Iahr denen landtägen, vndt andern Zusammenkhünfften in bemelten Vnserm Erb Marggraffthumb Mähren, als Probst zue Pöltenberg beygewohnet,
dabey Vnsere gnädigste intentiones vndt angelegenheiten, wie es einem fromben standt gebühret, iederzeit bestmöglichst secundiret, vndt befördert, solches vndt dergleichen treugeleiste dienste
ferners in treu schuldiger devotion zuebezeugen deß gehorsambsten anerbiethens ist, solches auch, seiner habendn gueten qualitetn nach, thuen khann, soll, vndt mag. Alß haben Wir mit wohlbedach
tem mueth, guetem rath, vndt rechtem Wissen, besagten Thoman von Clesin zue Vnserm kaiser: vndt Königlichen rath gnädigst gewürdiget, auff vndt angenomen. Nehmen auch, vndt würdigen ihn darzue
wissentlich in krafft dises brieffs. Mainen, setzen, ordnen, vndt wöllen, das er nun hinführo Vnser rath sein, von männiglich darfür gehaltn, erkennet, geehret, genandt, vndt ihme solcher titul
auß allen Vnsern Cantzleyen, vndt sonsten gegebn, vndt geschriebn werde, darzue auch alle vndt iede ehr, Würde, vndt Vortheill, Freyheit vndt gerechtigkeit, wie andere Vnsere räthe habn, vndt sich derer erfreu
en, gebrauchen, nutzen, vndt geniessen soll vndt mag, Von Iedermänniglich Vngehindert. Iedoch soll er dargegen Vnsere gehaimbnussen, so ihme anvertrauet werdn, biß in sein gruebn zueverschweigen, auch in sachen
vndt geschäfften, darzue er ins künfftig gebraucht werdn möchte, vnß seinem gueten Verstandt nach, das beste einzuerathn, Vnsern nutz vndt fromben zuebefördern, schadn vndt nachtheill züewarnen, vndt zueverhueten schuldig
sein, auch sonsten in gemain alles das ienige züethuen, wie einem getreuen rath gegen seinem Herrn sich zueverhalten gebühret, vndt geziemet, ohnmassen dann Vnsere gnädigste vertrauen in seine persohn gerich
tet ist. Zue Vrkundt diß brieffs besigelt mit Vnserm kaiser: vndt Königlichen anhangenden grössern Insigl, der geben ist in Vnserer Statt Wien, den Acht vndt Zwanzigsten Monatstag Augusti,
Ad mandatum Sac(rae) Cæs(areae)
Regiæq(ue) Maiestatis proprium.
Gottfrid von Walderode