Ich georgius krewczer mit dem stern di czeit probst auff dem pelm perig pey cynam beken offenlich mit disem offen briff allen den
di in sehen horn ader lesen das ich dem vorsichtign iobst lanczust meim vnd meins ordens hoff czu cziomicz mit wol vordochtn mut
vnd bevelug meins obristn mit den eckern vnd wisn di dor czu geheren vnd do mit er vns her verlihen worden ist vnd do er mit alter
loblicher gewonheit vns her kumen ist treulich vnd vngevrlich auff cwen leib vorlihen hab Im vnd meim noch kumen dauon
czu dinen gehendeczuraichen Auff michaelis fufczig grossen vnd auff georgij aber fufczig grossen vn vorczoglich czu czinsen
Auch vnd meim noch kumen vor sein rechtn erb hern czu habn wider mich vnd meim orden vnd noch kumen kain hern czu habn
der mir vnd dem orden schedlich wer in kainerlai mosz den egenantn hoff auff czu pauen er vnd sein erbn vnd noch kumen
den nicht vor seczen vor phendn christn noch iudn ab er ader sein noch kumen den vor phendet vor seczt das es nicht krafft hab
vor allm rechtn mir vnd meim noch kumen vnd armen leutn an holcz an wisn an eckern an viehwaid vnd an alln andern sachen
nicht schadlich haimlich vnd offenlich an sein meim frumen czuwerbn vnd schadn czu wenden vnd ich mag vnd schol mich vnd
meim noch kumen czu im vnd alln den di auff dem hoff sein werden halden in allem rechtn do mit das stift aus geseczet ist
vnd geseiczt als czu andern leutn di czu der egenantn stift gehern vnd der offt genant hoff schol dem orden noch seinem
vnd dem andern leib der in noch im inen habn wirt frei vnd ledig haim gren do mit czu tuen vnd czu lossn das alles czu
halden hat er mir vnd meim noch kumen gelubt pei sein gutn wortn treuen vnd ern an des ordens stat an geuer als den
der briff inen halden ist den er mir vnd dem orden gebn hat Auch schol der egenant iobst mit ainen rosz der egenantn
stift dinen das sag ich im auff di cwen leib ledig vnd frei durch seiner dinst willn di er mir vnd dem orden getan
hat des czu vrkund vnd geczeugnuss hab ich gepetn den ersamen weisn ludwik posen purger czu cynam das er sein
sigill mit sampt dem meim an disn offn briff gehangen hat im vnd sein erbn an schadn vnd an enhelt der gebn
ist czu cynam noch crist gepurt tawsent vierhundert iar dar noch in dem vier vnd fufczigstn iar an der heilign
merterer fabian vnd sebastian tag