Von Gottes Genaden Wir Ferdinand
Johann Deß Hey(ligen) Rom(ischen) Reichs Fürst von Liechtenstain Vnd Nicolspurgk In
Schlesien Hertzogg Zue Teschen Grossen Gloggaw Troppaw Vnd Jägerndorff Herr Zue Mährischen Krumaw Rom(ischer) Kay(serlicher) May(es)t(ät) Obrister (etc.)
Thuen hiermit Kundt vnd Zue wissen; Demnach Vns Vnsere Gemählinn Liebd(en) Die Hochgeborne Fürstin Vnd Fraw Fraw Dorothea Anna Maria Deß Hey(ligen) Rom(ischen) Rei
chs Fürstin von Liechtenstain Vnd Nicolspurgk In Schlesien Hertzoggin Zue Teschen Grossen Gloggaw Troppaw Vnd Jägerndorff Fraw Zue Mährischen Krumaw Geborne
Gräffin von Lodron Auff Castel Roman (etc.) eine Guldinne mit Vier und Achtzig Stück Diamand besetzte Ketten Zue Vnserm gebrauch vnd Notturfft an einen gewissen Orth Vberlassen, vnnd Wir nun
Solche Ihrer Liebd(en) Erwiesene Bezaigte Willfährigkeit mit ichtwas Andern hinantgegen Zue ergetzen gemainet; Alß thuen Wir hiermit wissent(lich) Vnd Wollbedächtlich Krafft gegenwertigen Auff Pergamen deroh(alben)
Von Cessions Brieffs, Vnseren Aigenthumblichen, vnd gleich bei Antrettung der Regierung Dieser Herrschafft an Vns Käufflich gebrachten Freÿhoff Zue Rakitz, Sambt allen Vnd Jeden Darzuegehörigen, dort oder nicht dort ligenden
Weingarten, Äckern, Wiesen, Fischwassern, vnd wie sonsten die bißhero Innhabere, vnnd Possessores Rechtmässig darbei gaudiret, vnd genossen, An Statt vnd für die Gedachte Guldinne Ketten, In die Sibenhundert gulden
Reinisch ästimiret, Wohlermelter Vnserer Gemählinn Liebd(en) Vnd Dero Erben für Aigenthumblich vbergeben Cediren vnd abtretten, Also vnd dergestallt, Das Ihre Liebd(en) oder dero Erben, mit selbigem Freÿhoff Zue Rakitz, Sambt allen apper
tinentien Nach Ihrem Belieben vnd Wohlgefallen, disponiren, Gebahren, vnd handlen, können, vnd mögen, Jedoch mit Diesem Reservat Dafern Ihre Liebd(en) oder Dero Erben, Vber kurtz oder lang, Mehr erwehnten Freÿhoff Zue Rakitz Zue verkäu
ffen, Oder Sonsten Zue ver alieniren gesinnet, Daß alßdann, oder Künftigen Innhabern vnd Possessoribus Dieser Herrschafft (Sintemahln solcher Vnter derer Botthmässigkeit begriffen) Selbiger für allen Anderen, ob Wir oder Vnsere nach
Kommende Ihn, vnd Zwar in gedachten Werth Der Sibenhundert Gulden Reinisch, Wieder an Vns Zue bringen gefallen tragen möchten, Also den Vorzug Zue haben, angebietten Vnd Offerirt Werden, Doch daß die erklärung darüber à tempo
re insinuationis des Vorhabenden Verkauffs Innerhalb eines Monatsfrist beschehen, vnd nicht Länger anstehen solle; Vnd Alldieweilen Eemelter Freÿhoff in etwas Baufällig, Vnd das Gebäu Ziemlichen abgang, Die Behausslichen Wohnung hat,
Vnnd alß der Notturfft nach reparirt, oder ein Mehrers darzue Gebauet Werden Sollte, So ist nichts alß billich, Daß Ihrer Liebd(en) Diese Vnkosten vber die Gedachte Sibenhundert Gulden Reinisch Bezahlet Werden; Weilen auch Von offt
gedachten Freÿhoff Zue Rakitz Jährlichen ein gewisser GoldtZinns Vermög Vrbary, Benandtlichen Zweÿ Taler Mährisch, Eilff Groschen Weiß Zue dieser Herrschafft Rendten, vnd dann der gebürende Zehendt Von dennen Felderen fällig ist,
So Wollen Wir Zwar selbige Schuldigkeit, So lang Diese Herrschafft in Vnserer Posses, Vnd Ihre Liebd(en) des Freÿhoffs besitzerinn seindt, nachsehen; Wann aber diese Herrschafft, Oder der Hoff, eines auß Beiden, in Andere Hände vber kurtz oder lang,
Erwachsen solte, Würde sodann diese Allte Schuldigkeit ihren gang Vnd Lauff, wie Zuuor haben, Vnd der Innhaber des Hoffes solch Zueerfüllen, Willig seindt Zue entrichten, vnnd den Zehendt Zugeben Verbunden sein. Nachdeme Danebens
inconsideration Zue Ziehen, Wasgestallten etzliche Jahrhero Von dennen Gesambten Löbl(ichen) H(erren) Ständen Dieses Marggraffthumbs Mähren, In ansehung derer so groß Vnd Vberhäufften Allerhandt Beschwerdt Vnd Anlagen, Auch auff die Freÿ
höffe ein gewisser Anschlag Zum beitrag Vnd hilff des Allgemainen Lastes bewilliget, Vnd auffgelegt Worden; Also wirdt selbiges Onus, Da fern dieserfalls einige Ahnmahnung Vnd abforderung Künftig beschehen solte, Wohlermelter Vnserer Gemählinn
Liebd(en) Zue ertragen, vnnd daß darauff Kommende Quantum Zue entrichten obligat; Von Allen Resten aber, oder so ichtwas Andere Frembde Schulden darauff Hafften möchten, Verbinden Wir Vns Krafft dieses Ihren Liebd(en) aller Gefehrn schad
vnnd Klagloß Zuhalten. Zue Bekräfftig(ung) Vnd mehrerer Bestättigung Dieser Vnserer Cession, haben Wir Zue Zeigen auch sich neben Vns Zue Vnterschreiben, Jedoch Ihnen Vnd dennen Ihrigen ohne nachtheil, Den Wohlgebornen Herrn
Herrn Wilhelm Dubsky Titul(ar) vnnd dann den Gestrengen Vesten Johan Wilhelm Müllern von Mülbach Titul(ar) (Res(pective) Vnd ge(treuen) rath) Auch Vnser angeborenes Fürstl(iches) Insigel Wissentlich hieran hangen Lassen, So geschehen Auff Vnserem
Fürstl(ichen) Schloß in Vnserer Residenz Statt Mährischen Krumaw Den Zweinzigisten Monats Tag February Nach Christi Vnsers Heilands Vnd Seeligmachers Gebürtt, Deß Ein Tausent Sechs hundert Siben Vndt
Fünfzigisten Jahrs