In dem Nomen vnsers Herren Amen Wir Paulus von Gotes genaden Abbt zu prugk Wolffgangus prior Georgius
Supprior Paulus Curator vnd das gancz Conuent des benanten Chloster zu prugk premonstrater Orden Olomuczer
Bistumbs Czu ainer ewigen gedechtnus der ding tun wir kund mit dem brieff allen leuten vnd wo es fur darzu ge
purt Das wir verchaufft haben vnd mit krafft dicz brieffs verchauffen ain holcz ob Eibspicz vnd der pawmgertlein
gelegen In den Grenczen so es dann awsgetailt vnd mit marckstain awsgeseczt ist worden den Schöppen vnd der
ganczen Gemayn zu Eibspicz Vnd das In solicher mas das sie das holcz daselbs vnd der wald geniessen schullen
vnd mugen Doch das vnser werck awch dahyn getriben werd wenn des not tut Dauon so schullen die obgenanten
Schöppen vnd dy Gemayn von Eibspicz Czynzen alle Iar Ierleich czway Schok grossen gewondlicher muncz fur yeds
schok Sechczig grossen vnd fur yeden grossen Suben phenning zuraytten Anhebend von datum des brieffs zu sannd
Iörgentag ain Schok vnd zu sannd michelstag darnach volgend das ander Schok vnd also schullen sie tun ewich
leich vnd ir nachkomen In dem so nemen wir aws alles Gevaid das wir das pawhen nach vnser notdurfft Vnd
ob wer awff dem benanten holcz begriffen wurd vnd dem Gevaid nach gieng der da wer awsserhalben vnser diener
der selb schol geantwurt werden zu der straffung In das Chloster Awch das Czapperlamb so die Burger In die Stat
Indem nemen Das schullen sie frey nemen Item die Schöppen vnd dy gancz Gemayn zu Eibspicz die haben frey
fur zuschenken oder ain Sigenhaws zuhaben der ganczen Gemayn zu nucz Dauon schullen sie vns Ierlich kaufn
lond geben zu sannd michelstag Zwenczig grossen gewondlicher muncz als oben begriffen ist - Diser aller obgeschri
bner ding zu Vrkund vnd pesser sicherhait So haben wir obgeschribne Abbt vnd Conuent vnser aygne Insigl
an disen brieff gehangen mit vnserm guten willen vnd wissen Der geben ist zu prugk des freitags vor dem hey
ligen Weynachtag Nach Cristi gepurd Vierzechenhundert vnd In den dreyundachczigsten Iaren