Ich Johannes von pegaw krewtzer mit dem Roten Stern Probst auff dem pelinperg Bekenn offenlich vor allen
menigklich das ich der Erber gantzn Gmain zw Teschwitz fierdhalb krawt Garten auff meinem gruntg
gelegn nebn der Gartn der brueder von dem heilign krewtz nahet bey der Theya versetzt hab die etwan Czehet
krawt gebn habn vnd nw zw krawt Garten nymer twgen Die selbign gartn hab ich obgemelt hans probst
der Genantn Gmayn zw Teschwitz dar aus weingartn vergunt zwmachen Doch in solher mas das die Genant
Gmayn zw Teschwitz sollen vnd schuldig sein vnd werden gallen vnd raichen den Czins mir vnd mein nachkomend
Jarleich vnd ewikleich auff das kloster pelinperg von dato des brieffs alweg auff Sandt Michels tag vier gro
schen Auch sal ain fues Steig durch die selbigen garten in die Mull geen vnd kain ffurwek noch zw reyten als
dann Ee von alter gewonhait ist gewesen Des zw vrkundt vnd warer sicherhait Ich abgenanter Johannes probst
In disn brieff gebn mit meinem guetn willen vnd wissen mit meinem anhangenden Sigl besigilt vnd darzw
hab ich gepetn Den Erwirdign herrn paule Abt des closters zw pruck vnd den Edln Jan Benigkn von Dbra
mit das sy Ire ir Sigl neben dem mein zw Czewgnus der sachhalb doch ym vnd dem Conuent vnd des bena
ten Benigkn vnd sein Erben an schaden haben lassen anhengen zw dem brieffe Der geben ist am Sambstag an Sandt
Michels tag von Cristi gepurt Vurczehenhundert Jar vnd Indem Siben vnd Achtzigsten Jare