Wir Paulus von gotts gnaden abbt Wolffgangus prior Vlreich Subprior Martinus Circator Geor
gius Custos vnd das gancz Conuent des Closters zu Prugk auff der wiß Bekennen mit disem brieff gemainklich
vor allen die in sehen oder lesundt horen werden das wir mit gueter bedechtnus vnd mit guetem willen vnnsers
ganczen Conuent vnd durch willen vnnsers bestten vnd des ganczen klosters frumben Haben wir verkaufft
vnd verkauffen mit krafft des briefs Zu aÿnem rechten erib guet Vnnsern aÿgen pawngartten der eeder zuge=
hortt hat zu dem freÿn hoff Im dorff zu pochmalic mit allem dem rechten vnd zugehorung was In dem pawn=
gartten vnd darzu gehortt Also als wir In selbs vnd vnnser voruadern von allter her gehallten vnd besessen ha=
ben dem ffursichtigen Vlreich laydl Margretzen seÿner elichen hawssfrawn vnd Iren baider Erben vmb funff=
czigk schok grossen gueter klaÿner phenig vnd vmb zwaÿ schokh gr(oschen) Welhes gellt wir eÿngenomen haben
von In beraidt vnd genuczlich des gelaichen dÿ obgeschriben Vlreich laydl Margreth sein elichew hawss
fraw vnd Irer baider Erben vnd nachkomen den obgeschriben pawngartten schollen sÿ haben hallten
vnd fridlich geniessen an all vnnser vnd kunfftiger vnnser abbt vnd vnnsers Conuent khaÿnerlaÿ hindrung
Also als Ires aÿgens eribguets Doch mit solher ausnemung vnd berednus das dÿ obgeschriben Vlreich
laydl Margreth sein hawssfraw Ir erben vnd nachkomen vnd ein yeder der denselben pawngartten haben vnd halten
wirdt vns vnd vnnsern kunfftigen abbten von demselben pawngartten ewiger gillt raichen vnd gellten schol alle
Jar auf den tag Sand Michels eÿn halb schok gross guet klaÿner mÿnss sÿben phennig vor eÿnen groschen
Zu ratten die zu derselbenczeit gemaynklich Im landt zu Merhern lewffig vnd nemlich ist vnd also
albeg auff alle Jar schollen sÿ zynsen vnd raichen auff den obgenanten tag Wer aber sach das sÿ von
Ires bestten oder nucz wegen do got vor seÿ den obgeschriben pawngartten verkauffen oder verbesessellen
oder versetzen verschaffen wolten daselbig mugen sÿ auch wol tuen dar In wir sÿ nicht hindern schollen
Sunder sÿ mugen da mit handln als mit Iren eÿgen erb guett Vnd den selbigen pawngartten schollen dÿ
selbigen auff geben vnd auff nemen Nach des klosters gewonhait Vnd wir obgeschriben abbt vnd
Conuent vnd vnnser nachkomen gluben wir dem obgenanten Vlreich vnd Margrethen seiner elichen
hawssfrawn vnd Iren Erben vnd nachkomen auff dasselbig nicht Infall machen In khaÿner weiss weder
demselben der den obgeschriben pawngartten haben wirdt vnd alles was In disem brieff beschriben ist
geloben wir genuczlich zehalten an alle zerruttung Vnd des zu zeugnuss vnd zu bestettung der ob=
geschriben ding So haben wir obgeschribne abbt vnd Conuent vnnsern aÿgne In Sigl mit vnnserm
gutten willen vnd wissen angehangen zu disem brieff der geben ist Nach Cristi geburdt Vierze=
henhundertt vnd Im Subenndachtzigissten Jare an aller heÿlign dreÿ kunig tag