Wir Leopold von Gottes gnaden Erwehlter Römischer Kaiser
Zu allen Zeiten Mehrer deß Reichs in Germanien zu Hungarn Böhaimb Dalmatien Croatien vnd Sclauonien (etc) König Ertzherzog zu Osterreich Marg
graff zu Mähren Hertzog zu Lützenburg (etc) Bekennen offentlich mit disem Brieff für Vns Vnsere Erben vnd Nachkommen, demnach Vns Vnsere getrewe Fr(ater) Matthaeus Sebastiani
Prior vnd der gantze Conuent deß Closters Obrowitz Praemonstratenser Ordens in Vnserm Marggraffthumb Mähren in Vnderthänigkeit zu erkennen geben, welchergestalt sie nach absterben
ihres gewesten Praelaten Fr(atris) Engelberti Benetka Ordinis Praemonstratensis in beysein deß von Vns darzu in Vnserm Namen ad actum deputirt gewesten Com
missarien Canonice zur Wahl geschritten, vnd darbey einhellig den obgedachten Fr(atrem) Matthaeum Sebastiani zu ihrem Praelaten vnd Abbt erwehlt, Vns derowegen aller Vnderthänigst
gebetten, Wir geruheten solche ihre Wahl gnedigst zu ratificiren vnd zu bestättigen. Wann Wir dann gnedigst angesehen, daß der erwehlte Fr(ater) Matthaeus Sebastiani mit gueten
Sitten, Wandel vnd Erbarkeit begabt, auch in der H(eiligen) Schrifft vnd andern gueten Künsten wol erfahren, vnd sonsten von guetem Exemplarischen Leben vnd andern gueten Qualiteten seye, Vnd Vns deßwegen
sein Vnderthänigstes Bitten gnedigst gefallen lassen, So haben Wir die obgedachte Canonice beschehene Election ihme so wol, als dem gantzen Conuent in Kaiser(lichen) vnd König(lichen) Gnaden, ex certa scientia vnd Vnserm
wolbedachtem Mueth, auch Vnserm Marggraffthumb Mähren zu guetem, Ratificirt vnd bestättiget, Ratificiren vnd bestättigen hiemit solche Election, vnd thuen darzu Vnsere vollkommene, als regierender König zu Böhaimb
vnd Marggraff in Mähren, auch Oberster Landsfürst, Kaiser(liche) König(liche) vnd Landsfürstliche Consens vnd Bewilligung in Krafft diß Brieffs. Gebieten darauff allen vnd jeden Vnserm Praelaten, Herren, Rittern, vnd vom
Adel, Landeshauptleuten, Vicedomben, Haubtleuten, Vndterhaubtleuten, Burgraffen, Pflegern, Verwaltern, Ambtleuten, Richtern, Burgermeistern, Räthen, vnd allen andern Vnserm Vnderthanen vnd Ein
wohnern in Vnserm Marggraffthumb Mähren, was Würden, Standts, oder Wesens die seyn, daß sie den obgedachten Fr(atrem) Matthaeum Sebastiani, vnd den gantzen Conuent an ihren Geistlichen vnd Weltlichen
Rechten, Freyheiten, Priuilegien, vnd Gerechtigkeiten, wie sie dieselbe von Vns vnd Vnsern Vorfahren am Reich, vnd in der Cron Böhaimb bißhero herbracht, vnd in Vbung gehabt, nicht hindern, noch irren, sondern
sie darbey geruhig bleiben, vnd sie deroselben in allen Dingen geniessen lassen, auch ihme Fr(atri) Matthaeo Sebastiani, als einem rechtmässigen Praelaten vnd Abbt, in allen billichen Dingen gehorsamb seyn,
vnd ihme den gebührenden Respect vnd Ehre erweisen, vnd hierwider nicht thuen, noch jemanden andern zu thuen gestatten, bey Vermeidung Vnserer schweren Vngnad vnd Straff. Doch Vns, Vnsern Erben
vnd Nachkommen an Vnsern Rechten, vnd Gerechtigkeiten, auch menniglich an den seinen vnschädlich. Zu Vrkundt diß Brieffs besiegelt mit Vnserm Kaiser(lichen) vnd König(lichen) anhangenden
Grössern Insigel. Geben in Vnserer Statt Wienn den Siebentzehenden Monats Tag Nouembris, im Sechtzehen Hundert Ein vnd Sechtzigsten, Vnserer Reiche, deß Römischen im Vierten,
deß Hungarischen im Siebentzehenden, vnd deß Böhaimbischen im Sechtzehenden Jahre.
Leopoldus
Ad mandatum Sac(rae) Caes(areae)
Regiae(que) Maiestatis proprium
Jo(hannes) Paul(us) Hocher
Jo(hannes) Fridericus
von Mayern