Hyacinthus Hohman Sacri Ord(inis) Præmonst(ratensis) Eccl(esi)æ Strahoviensis ac Milovicensis
Abbas, per Regnum Bohemiæ ac incorporatas Provincias Vicarius g(ene)ralis ac Visitator perpetuus, etc.
R(everendissi)mo ac Ampl(issi)mo D(omi)no D(omi)no Maximiliano Pfandler eiusdem Sacri Ordinis Eccl(esi)æ Zabrdovicensis
Abbati, etc. Salutem in D(omi)no. Assumpti in partem sollicitudinis illius, qui ordinariam in
Ordinem n(ost)rum Vniversum plenitudinem gerit potestatis, eo quoq(ue) Zelo Zelamur, non tam vt
parta tueamur, quam deperdita recuperemus. Sanè cùm intimo commiserationis affectu
tangamur super desolata Ordinis Ecclesia Chaunicensi, quæ adhuc inter vetusta rudera sanctitate
spirat, vtpote tot innocentissimarum Victimarum ac Ch(rist)i Sponsarum sanguinis profluviis,
quos parricidales manus vnâ nocte simul sustulerunt, nobilitata, toto simul conatu eò
tendimus, vt hæc non vulgaris portio hæreditatis Ch(rist)i ac Sancti Fundatoris n(ost)ri Norberti
postliminiò redeat. Proinde R(everendissi)mam Vestram Dominationem, vtpote de cuius
prudentia, agendi dexteritate et ferventi in Candidissimum nostrum Ordinem Zelo
plurimùm confidimus, ac inprimis de gratiosissima inclinatione ad avitum DEO cultum
et Religionis n(ost)ræ augmentum promovendum Cel(sissi)mi Principis (tit.) benignè sperantes,
authoritate Ill(ustrissi)mi P(at)ris g(e)n(er)alis nobis delegatâ Extraordinarium Commissarium ad
effectum prætacti negotij nominamus, constituimus, publicamus, ac vigore huius Instrumenti
nominatum, constitutum, ac publicatum volumus, dantes eidem plenariam facultatem
Cel(sissi)mum Principem opportunis medijs interpellandi, cum eodem conferendi, tractandi
si quo modo, saltem Ecclesiam cum Parochia Ordini nostro gratiosè restituere dignaretur:
habiturus pro hoc DEVM copiosum remuneratorem, ac Sanctum Patriarcham nostrum
Norbertum efficacem Intercessorem. In quorum fidem ac robur præsentes propriâ
manûs subscriptione ac Sigilli Vicariatus nostri appressione munivimus, nec non
á Secretario n(ost)ro subsignari mandavimus. In Ecclesia n(ost)ra Strahoviensi Pragæ
vigesimâ tertiâ Augusti Anni millesimi Sexcentesimi Octuagesimi quarti.
Fr(ater) Hyacinthus Abbas Strahov(iensis)
et Vicarius Generalis m(anu) p(ropria)