Wir Albreht von gotes gnaden Herczog ze Osterreich ze Steyr ze Kernden vnd ze Krain Graff ze Tyrol (et)c(etera) Bekennen vnd tun chunt openlich mit disem briefe Wann der Allerdurchleuchtigist furst vns(er) lieber gnedig(er)
herr vnd vater her Karl Romischer kayser ze Allen zeiten merer des Reichs vnd kunig ze Behem der hochgebornen furstinne frowen Elsbethen von Behem seiner tochter vns(er) lieben gemaheln vnd durch irn
vns durch sunder lieb vnd begier die er zu vns hat freilich vnd lediglich seins guten willen gegeben hat Virczig Tausent guldein guter vnd swerer der gewicht von florencz Darumb nach pillicher erkant=
nusse solicher genediger vnd freuntlicher hilffe vnd furdermuge haben wir dem egen(anten) vns(er)m herren dem kayser vnd der obgenanten seiner tochter vns(er) lieben gemaheln Vier Tausent guldein ierliches geltes daczuslahen
vnd vergewisset auf vns(er) veste ze Wartenstain vnd auf vns(er) purgk vnd statte ze Krain vnd ze Stein vnd auf alle die nucz vnd gulte die darzu gehorent In solicher macze beschaiden davor got sey Daz wir ab
giengen vor der egenanten vns(er) gemaheln vnd chain leibes erben bey ir liezzen So sullen die egenanten vns(er) vesten vnd statte vnd die Vier Tausent guldein gultes in pfandes weise gewallen fur das egenant gelt
auf die vorgen(anten) vns(er) gemahel Wenne aber die abget vnd erstirbet So sullen si erben vnd gewallen ouch in pfandes weise fur dasselb gelt der Virczig Tausent guldeiner Auf den egen(anten) vns(er)n herren den kayser vnd
auf sein erben kunige ze Behem Gienge aber die vorgen(ante) vns(er) gemahel vor vns ab So sullen die egen(anten) vesten vnd statte mit den Vier Tausent guldeinen geltes vns vnd vns(er)n erben beleiben an widerred vnd
geuerde ez sei daz wir die haben bei der egen(anten) vns(er) gemahel oder bei einer and(er)n frowen die wir nach ir zu der ee genomen hetten Were aber daz in solicher geschiht als davor beschaiden ist die vorgen(anten) vesten
vnd statte vnd die Vier Tausent guldein geltes die egen(anten) vnser gemahel oder einen kunig ze Behem an erstarben von den von denselben vesten vnd stetten die Vier Tausent guldein geltes ierklich
niht gewallen mochten Wz dann daran abgieng vnd gebraste das sullen wir in anderswo erstatten von dem nechsten gulte so wir dabi hetten in dem lande ze Osterreich an geuerde Wz aber vber die Vier
Tausent guldein ierlichen dauon geuellet das sol dem hochgebornen fursten vns(er)m lieben bruder Herczog Leupolden vnd vns(er)n erben vnd nachkomen zugehoren vnd beleiben Ouch sullent die purgk die egen(anten) purgk vnd
statte innhaben vnd halden der vns(er) die vorgenanten vesten vnd statte von vns enphelhen werdent Die sullent swern daz si vns(er)n erben gemaheln oder vns(er)n herren oder seinen erben kunigen ze
Behem mit der pfantschaft derselben vesten stetten vnd gulten gewertig vnd gehorsam sein in aller der macze als davor beschaiden ist ob ez ze schulden chome vnd als ouch das ierund getan habent vns(er) getrewn
lieben haubtman ze Osterreich dem wir die egen(anten) purgk krain vnd stein mit iren zugehorungen vnd hans von Liechtenstain von Nicolspurg vns(er) hofmaister dem wir die
veste Wartenstain mit dem markte ze Krain vnd mit irer zugehorung enphelhen haben Wir sullen aber die egen(anten) noch chain ander purggraue oder phleger der egen(anten) vesten vnd statte niht seczen
noch entsetzen ane vnsers herren des kaysers oder seiner erben kunige ze Behem sunder wort willen vnd wizzen Wir schaffen ouch vnd wellen daz die purgk der egen(anten) vns(er)r statte krain vnd ze Stein
ouch swern mit der egen(anten) pfantschaft gehorsam vnd gewertig ze sein als davor geschaiden stat ob ez ze schulden chome Ez sullent ouch die vorgen(anten) vns(er) gemahel oder ein kunig ze Behem auf den
vorm(als) die egen(anten) vesten statte vnd gulte also gewallen wern vns(er)n egen(anten) bruder Herczog Leupolden oder seinen erben vnd nachkomen Herczogen in Osterreich losung der vorbeschaiden vesten statte vnd
gulte stat tun vnd gehorsam sein ane alle widerred wenne si den mit Virczig Tausent guldeinen ermant werdent an geuerde Vnd daruber ze vrchund vnd sicherhait hiezen wir vns(er) Ingsigel
henngen an disen brief Der geben ist ze Wienn an sand Augustins tag Nach kristes gepurd Dreuczehenhundert Iar Darnach in dem Newn vnd Sechczigisten Iare

Der bur(ggraue) marschalk(us) p(ro)u(in)cial(is) de e(pi)s(cop)o(rum)