Wir Albrecht von gots gnaden pfallenzgraue bei dem Reing / Herczog in Beyern / Anwart der Graffschafte zu Hennegow zu Holland / zu Seland vnd der herschaft zu fryesland Bekennen
vnd tunkunt offenlich mit disem briefe allen den die in sehen odir horent lesen das wir mit dem Allirdurchleuchtigsten fursten vnd herren hrn karl Romyschem keiser zu allen zeiten
merer des Reichs vnd kunige zu Behem vnsim lieben gnedigem Oheim vnd herren vbir eyn komen sein / vnd das Redelich daiden globt vnd gesworn haben beiderseiten das der obge=
nant vnsir gnediger herre die durchluchte Juncfrawen Anna / seine tochtir dem hochgeborn Albrechten herczogen zu Beyern vnsim Sone zu eyner elichen wirtinn / vnd rech=
tir beyslaft / vnd wir hinwider derselbn vnsirs Son Herczogen Albrecht der egenant Juncfrowen Anna zu eynem rechten elichem wirte vnd rechten beyslaft geben vnd
zulegen sullen vnd das sullen wir wellen wir beiderseite enden vnd genczlichen volfuren von pfingsten die schirst kunftig seyn vbir acht gancze Jare nest noch eynandir
zugen / Also vornemlich das der egenant vnsir herre der keiser der egenant Juncfrowen Anna seiner tochtir zu heymstewre vnd egelte wie man das gewonlich pflegt
zu nennen zehentausent schokke grozzer pfenning prager muncze geben sulle vnd dieselbn Summe geldis dem egenant herczogen Albrechten vnsim Sone richten vnd beza=
len / innewendig zwein ganczen Jaren / nach dem tage so die kinder zu eynandir gelegt werden als vorgeschriben stet / mit bereitem gelde odir sulchir werung als das in andirn
seinen briefen die er vns darubir gebn hat volkomplich begriffen ist / Vnd ist geredt globt vnd gesworn das wir dem egenanten vnsim Sone herczogen Albrecht zu
heymstewre odir egelte funfzehentausent schok grozzer derselben pragerschen muncz geben sullen vnd die der egenanten seiner wirtinn uf dieselbn frist das ist zwey
Jare noch dem vnd die kindir beyeynandir gelegen haben vorrichten vnd bezalen / Vnd fur dieselben Summgelts vnd ouch fur die zehentausent schok die der egenant vnsir
herre der keiser vnsim Son zu seiner tochtir geben sol zu pfande seczen vorwitiben vnd vorantwurten alle vnse lande vesten vnd gute die wir disshalb der tunow haben /
mit namen hiltegarssperge / sinstenstein / trutlingen / die stat zu volfhouen / das Gerichte zu hengersperge / teltendorf / breibach / zeissporn / toptingen / das waltach
mit namen den winkel / den Schonenberg / furtt vnd chamb / ob es von herczog Ruprechten zu der zeit geledigt were / Wurde es abir nicht geledigt binnin der zeit
als vorgeschriben stet / so sol volfhouen mit seinen zugehorungen / so lange pfant da fur sein / vnd das chamb ledig wirdet / Wann ouch denn chamb ledig wirdet vnd zu
pfande geseczt als vorgeschriben stet / so sol volfhouen mit seinen zugehorung wider ledig vnd los sein / vnd sullen die vorgenant slosz vesten stette markte vnd gute mit
landen leuten vnd allen iren herschaften vnd zugehorung / bei namen / mit funfundzwenczig hundirt schokken grozzer pragerscher pfenning / reiczer gulde der egenanten
vnsir tochtir herczog Albrechts vnsis Sons wirtinn / alle ire lebtag / fur die egenant funfundzwenczig tausent schokke grozzer gewarten / vnd ire lebtag bleibn / Were
abir das der egen vnsir Son herczog Albrecht ir wirte von todis wegen abegienge vnd sturbe ee wann sie / so sulln widirumb dieselbn lande vnd pfantschaft mit allen
herschaften nuczen vnd zugehorungen / dennoch ire lebtag bleiben vnd gewarten / Gienge abir sie ee ab dann er / so sullen die zehentausent schok ouch in seine lebtag
bleiben vnd gewarten / Geschehe abir das sie beide also beiderseit abegiengen vnd sturben / das sie eliche leibes erben die sie miteynandir hetten / hindir in nicht liezen / So
sol fur furbas sol das egenant gelt funfzehentausent vnd zehentausent schokke widir vallen / vetliche an die stat von danne es her komen ist / Ouch habn wir beidir=
seite globt vnd gesworn das wir bestelln sullen das alle vnse Amptleuten pfleger vnd Amptleute die von vnsin wegen die egenant vesten stete vnd zugeho=
rungen yeczunt ynnehaben / das globen vnd sweren sullen / das sie in guten truwen angen / als alle die egenanten vnse teiding beredung vnd glubde in aller
der mazze als vnse briefe beiderseit sagen / als oft es an isliche kumpt getruwlich genczlich vnd fleizziclich vnser vetlichem halden enden volfuren vnd gewar=
ten sullen / Vnd zu welchir zeit wir des zurate werden beiderseite das wir andir Amptleuten pfleger vnd Amptleute seczen wolten / odir leudte dieselben
von todis wegen abegiengen / das denn alle die andern ire nachkomen / vns beiderseite dieselben glubde vnd eide tun vnd sweren sullen in aller der mazze
als ir vorfarn getan haben / Vnd als davor begriffen ist / Vnd das sullen sie tun vnd globen / ee wann sie sich sulchir Amptischaft pflege vnd Ampte
vndirwinden / czu vrkund dis briefs vorsigelt mit vnsim grozzen anhangenden Jngesigele / Geben zu prage am donerstag in der osterwochen noch Cristi geburde
dreyzehenhundirt Jar dornach in dem Aynvndsybenczigstem Jare .