Wjr der Burgermeister der stette vnd die Burger Gemeinlichn der stat ze Nördlingen ffür vns vnser erben
vnd nachkomen bekennen vnd tůen kunt mit disem gegenwürtigen brieff daz wir dem aller durchlüchtigistem
ffürsten vnd hren hren Karln Römischen keyser ze allen ziten mer des Riches vnd künig ze Beheim vnserm liebn
gnedigen hren als einem Römischen keyser vnserm rehten natürlichen hren alle die wile vnd daz er lebt vbunden
vnd verphlichtet sin welln vnd süln als ouch wir im daz gelobt habn vnd gelobn mit krafft ditz brieffs mit gůten
triwen Ane allez geuerde vnd Arglist Vnd by den eyden die wir liplich zu den halgen dar vb gesworn habn daz
wir im gen aller menglichn niemen vsgenomen bygestendig vnd beholffen sin welln vnd süln mit aller vnser
macht Ane alle widrede vnd züchen Ane geuerde Wenne vnd wie offt er des bedarff vnd vns daz mit sinen
briefen od(er) gůt kuntschafft ermant Sunderlich gelobn wir in dem namen als da vor daz wir die puntnüzze die
wir vormals mit im vnd sinen erbn künigen ze Beheim gemacht habn in alln iren punten maynung Artickln
vnd stücken als wir verbrieffet gelobt vnd gesworn habn stät gantz vnd vnrückt halten habn vnd vollefůren welln
vnd süln Ane alle geuerde Vnd des alles ze wärem vrkúnd haben wir der vorgen(anten) vnser stat jnsigel gehenkt an disen
brieff Der geben wart ze Ezzelingen An dem nehsten suntag nach sant oswaldz tag nach cristus gebürt drützehenhundert
jar Vnd in dem zwey vnd sybentzigistem jar