Wir Karl von gotes genaden Romischer keiser zu allen zeiten merer des Reiches vnd kunig zu Beheim bekennen vnd tun kunt offenlich mit disem briue allen den die jn sehen oder horen lesen Wann der hochgeborne Otte herzog in Beyern
vnser lieber Eydem vnd furste in den zeiten marggraff zu Brandemburg fur sich alle seine erben vnd nachkomen das furstentum der marggraffschaft zu Brandemburg mit allen seinen stetten landen leuten herschefften manschefften lehenschefften phar
schefften lehen geistlichen vnd werntlichen rechten eren nuzen geniessen vnd allen zugehorungen nichtes auzgenomen wie man die mit sunderlichen worten benennen mag mit wolbedachtem mute bei gesundem leibe mit gutem
wissen seiner vettern vnd frunde vnderwungen vnd mit rechter wizzen Dem durchleuchtigen fursten Wenczlawen kunig zu Beheim marggraffen zu Brandemburg vnd herzogen zu Slesien vnd andern vnsern sunen die wir izunt
haben vnd mit hilfe gotes in kunftigen zeiten gewynnen irn erben vnd erbes erben vnd ob die alle nicht weren dem hochgebornen Johansen marggraffen zu Merhern vnserm lieben bruder vnd seinen erben erblich vnd ewiklich gegeben abegetreten
vnd sich des slechttlich verziegen hat vnd auch alle fursten geistlich vnd werntlich prelaten grauen herren dinstleute ritter cnechte lantsazen burger gebawren vnd gemeynlich alle jnwonner desselben furstentums an denselben kunig Wenczlaw seine
bruder vnd ir aller erben vnd erbes erben vnd ob die nicht weren an den vorgenant Johansen marggraffen zu Merhern vnd seine erben vnd erbes erben wissentlich muntlich vnd brieflich als an marggraffen zu Brandemburg ir rechte naturlich vnd orde
lich erbherren geweist hat vnd wann auch die hochgeborn Stephan der elter Ote vorgenant herzogen Otten bruder Stephan Friderich vnd Johans desselben Stephans sune phallenzgraffen bei Reyn vnd herzogen in Beyern fur sich ir erben vnd er
bes erben vnd nachkomen aller rechte anspruche vnd zuuersicht die sy zu der marken zu Brandemburg vnd zu iren landen lewten rechten vnd zugehorungen von huldunge vnd briefe wegen furmals widerfaren was vnd die sie auch doran in dheinen
kunftigen zeiten gewynnen mochten slechttlich vnd ewiklich sich verziegen haben vnd an den obgenant kunig Wenczlaw seine bruder alle ir erben erbes erben vnd nachkomen ewiklich vnd ob die nicht weren an den obgenant marggraffen Johansen seine sone vnd
ir erben vnd erbes erben vnd nachkomen ewiklichen das obgenant furstentum mit allen landen stetten dorffen fursten geistlichen vnd werntlichen grauen prelaten rittern knechten burgern lantsazen vnd jnwonern als an ir rechte ordenlich vnd na
turlich herren ewiklich vnd erblich geweist haben als das in jren briuen die sie druber gegeben haben luterlichen vnd volkomenlich ist begriffen Vnd nunn auch fur vns so wir siczen in vnser keiserlichen maiestat komen ist der obgenant herzog Otte zu den zeiten als
ein marggraff zu Brandemburg vnd das obgenant furstentum mit allen landen lewten rechten vnd seinen zugehorungen mit danen vnd bannen die ein marggraff zu Brandemburg durch recht vnd gewonheit zu furen phliget vnd sulcher merkeit die nach furstlichs wor
den vnd siten dorzu gehoren vns als einem Romischem keiser desselben furstentums obristem lehenherre in kegenwertikeit vil fursten graffen vnd edlen des heiligen Reiches williklich offgetragen vffgeczuhet vnd vffgelassen hat vnd vns demuttiklich gebeten das
wir sulche offetragunge vffczug vnd vfflassunge als ein Romischer keiser gnediklich vffnemen wolten vnd dem egenant durchleuchtigen fursten kunig Wenczlaw zu Beheim Sigmund vnd Johansen seinen brudern vnsern sunen ir aller erben vnd erbes erben vnd
nachkomen ewiklich von vns vnsirn nachkomen Romischen keisern vnd kunigen zu rechtem lehen zu haben halten vnd besiczen vnd ob die alle nicht weren dem hochgebornen Johansen marggraffen zu Merhern vnd seinen erben vnd erbes erben vnd erbes erben vnd
nachkomen ewiklich vnd sie des in ir macht gewer seczen geruchten des haben wir angesehen sulche redliche bete des egenant herzogen Otten vnd haben mit wolbedachtem mute mit rate fursten geistlich vnd werntlich grauen herren edlen vnd des heili
gen Romischen Reiches lieben getrewen sulche offetragunge vffczug vnd vfflassunge des vorgenant furstentums mit allen seinen landen herschefften lewten rechten stetten dorffen vnd zugehorungen als ein Romischer keiser vnd desselben furstentums obrister lehenherre
vffgenomen vnd haben in kegenwertikeit des vorgenant herzogen Otten vnd auch des obgenant herzog Friderichs der in den zeiten mit vollem gewalt seines vatters vnd aller seiner obgenant bruder vnd von ir aller wege do kegenwertig was vnd auch in kegenwerti
keit vil ander fursten geistlicher vnd werntlicher graffen freyen herren die vorgenant durchleuchtigen fursten Wenczlaw kunig zu Beheim Sigmund vnd Johansen vnser vnd ir aller erben vnd erbes erben vnd nachkomen kunige zu Beheim marggraffen zu Brande
burg als marggraffen zu Brandemburg vnd ob die alle nicht weren den hochgebornen Johansen marggraffen zu Merhern seinen erben vnd erbes erben ewiklich mit demselben furstentum der marggraffschaft zu Brandemburg belehent vnd leihen sie auch mit vol
komenheit keiserlicher mechte mit craft ditz briues von vns Romischen keisern vnd kunigen vnsirn nachkomen vnd dem heiligen Romische Reiche zu rechtem furstlichen lehen zu haben halten vnd besiczen also das sie alle ir erben vnd erbes erben vnd nachkome
ewiklichen derselben marken ordenliche vnd naturliche erbherren sein sullen vnd die besiczen mit ganczem volkomenen rechten freiheiten furstlichen eren vnd wirden nichtes vzgenomen in aller der massen als sie die vorgenant herzog Otte vnd sein vorfarn
marggraffen zu Brandemburg gehabt gehalden vnd besessen haben die auch der obgenant kunig Wenczlaw vnser sun vnd seine bruder von vns als einem Romischem keiser mit furstlicher zierheit vnd schonheit empfangen haben vnd vns doran getan ge
wonlich eyde als sie von recht billich tun sullen vnd wir haben den obgenant kunig Wenczlaw vnd seine bruder alle vnser vnd ir erben erbes erben vnd nachkomen als druor begriffen ist jn rechter gewer aller lande herscheffte dorffen vnd stette derselben marke gentz
lich gesazt also auch izunt alle fursten prelaten grauen herren ritter knechte vnd gemeynlich burger aller stette der obgenant marggraffschaft denselben kunig Wenczlaw seinen brudern vnsirn vnd iren erben erbes erben vnd nachkomen kunigen zu Beheim vnd
marggraffen zu Brandemburg als marggraffen zu Brandemburg vnd ob die nicht weren dem habgebornen Johansen marggraffen zu Merhern seinen erben vnd erbes erben ewiklich als iren rechten ordenlichen vnd naturlichen herren williklich erblich vnd erb
lich gesworn gehuldet vnd gelobt haben in getrewe gewere gehorsam vnd vnderdanig zu seyn irn frumen zu werben irn schaden zu wenden vnd alles das zu tun das erblicke manne burger vndersezzen vnd lewte gen iren ordenlichen vnd naturlichen
herren marggraffen zu Brandemburg durch recht vnd gewonheit phlichtig sein zu tun Were auch das dheinerlei keiser recht gewonheit gesetze der fursten der stette oder der lande heimlich oder offenbar die nu gemachet sein oder noch gemachet
werden wider diese vorgenant abetretunge vorzeihunge offetragunge verlehenunge vnd sachen weren alleclich der letzelen oder jndheinerlei schaden bringen mochten so meynen wir vnd seczen von keiserlicher mechte volkomenheit mit craft ditz
briues das sie enkreftig sein sullen vnd widerrueffen verwerfen vnd vernichten dieselben gleicher weis als ob sie von worte zu worte in disem brieff begriffen weren vnd ob sie auch durch recht oder gewonheit wortlich begriffen solten sein in disem kegen
wertigen briefe vnd ob dheinerley gebrechen des rechten oder der tat der zierheit vnd schonheit die man durch recht oder gewonheit in allen diesen vorgenanten sachen billich getan hette versawmet were oder durch vnuernunftikeit der sinnen der wor
te von zweiuelhaftiger vzlegunge oder sust jndheinsweis in diesen obgenant sachen erfunden wurden sulchen gebrechen erfullen wir von rechtem wizzen vnd mit volkomenheit keiserlicher mechte in crefften dieses vnsirs keiserlichen briues doran verbieten wir
allermeniclich das nymand in was eren wirden oder stat der izund sei oder werden mag die obgenant abetretunge vfflassunge vorzeihunge vnd offetragunge vnser keiserliche vffnemunge gabe vorleihunge huldunge gelubde vornehmung gehorsa
vnd der gebrechen erfullung irren hindern betruben oder vernichten sullen in dheineweis wer aber dawider freuenlichen tete der sal in vnser keiserlich vngenad swerlichen vorfallen sein vnd sol tawsent mark lotiges goldes zu rechter pene bezalen sein
die halb sullen in vnser oder vnser nachkomen Romischer keiser oder kunige camer vnd das ander teil sol geuallen den wider die sulches vnrecht freuelich getan wurdet dieser dinge sint gezeuge die erwirdigen Johans erzbisschoff zu Prag des bebist
lichen stuls legat Johans zu Olomucz vnser canzler Lamprecht zu Straspurg Agapitus von der Columpnen zu Brixen vnd Sebastian paulo botte vnd Albrecht zu luthomussel bisschoue die hochgebornen Wilhelm zu Meichsen Johans der junger zu Merhern marg
graffen Przemisla zu Teschin Nidas zu Troppaw Ruprecht zu lignitz vnd Heinrich zu Minczberg herzogen die edlen Friderich burggraff zu Nurenberg Burckhart burggraff zu Meidburg vnd Rudolff von habspurg grauen Friderich herzog zu deck Engelhart
von Weinsperg krafft von hohenloch Peter von starnberg von rost vnser hofemeister Albrecht kolowrat Wankko vnd Andres von der dub vnd vil ander vnser vnd des Reiches fursten graffen edlen vnd getrewen mit vrkund ditz briues vorsigelt mit vnser
keiserlichen maiestat jnsigel der geben ist zu Prag nach Cristus geburt dreuczenhundert jar darnach in dem dreu vnd siebenczigsten jare an dem nehsten suntage nach sanct Michels tage vnser Reiche in dem sibent vnd zweinzigsten vnd des keisertums in dem neunczehenden jare