Wir Ratlute und Burger gemenlich der Stat zu Drawemburg Bekennen fur uns alle unser erben und nachkomen Burger zu Drawemburg, und tun kunt offenlich
mit disem Brive allen den die in sehent oder horent lesen, wann wir vormals gesworen und erbelich gehuldet haben, unserm herrn gnedigen herren keiser Karle Kunig
Kunig Wenczlawen von Beheim und seinen Brudern, und ir aller erben und erbes erben, als markgraven zu Brandemburg unsern rechten erbherren, Und ob die alle
nicht weren, markgraven Johansen von Merhern des egemanten unsers herren des keisers Bruder, seinen erben und erbes erben, als daz an andern unsern briven die wir
in daruber gegeben haben, volkomenlicher ist begriffen, Und wann ouch nu der egenant unser herre der keiser sunderlichen betracht hat, wie er die marken zu Brandem=
burg mit iren landen steten und leuten, die vormals langeczeit mit manigvaldigem kriege vorderbet und beschedigt ist, in ewigen fride und selikeit seczen muge, Und
uns zusunderlichen gnaden gegunst hat und gun daz wir und die egenant marken zu Brandemburg, von dem kunigriche und lande zu Beheim, der markgraffschaffte
zu lusicz, den herczogtumen zu Bressla zu der Swidnitz und zum Jawr, die zu dem kunigriche und der kronen zu Beheim gehoren, Und dasselb kunigriche hinwider von
uns und der marken ewigen schucz hilfe und rate haben mugen, Und ouch daz wir und di marke zu Brandemburg uns zu demselben kunigriche und lande zu Beheim
in ewige eynunge fassen und friden seczen mugen, Davon zu eren und dinste dem heiligen Romischem Reiche, durch ewigen fride besserunge und nuczes willen, unser
und der marken zu Brandemburg, die wir in disen sachen kuntlich erkennet haben und erkennen, So haben wir mit wolbedachtem mute, gutem vorrate und von unsern
rechten wissen, fur uns unser erben und nachkomen ewichlich und die egenant stat zu Drawemburg, mit willen und volbort des egenanten unsers herren des keisers,
als eines obristen lehenherren der egenanten marken zu Brandemburg, dem vorgenanten unserm herren kunig Wenczla allen seinen Brudern und ir aller erben erbes
erben und nachkomen, die nu sein und hernach geboren werden kunige zu Beheim, Und ob die nicht weren dem obgenanten markgrafen Johansen von Merhern, allen seinen
erben und erbes erben, als markgraven zu Brandemburg unsern rechten erbherren, gelobt und gesworen, geloben und sweren in guten truwen on alles geverde, daz wir ewichlich
bei dem kunigriche und lande zu Beheim bliben wellen und sullen, Und wir sullen und wellen, uns davon nymmer scheiden oder scheiden lassen, durch dheinerlei sachen oder
sachen willen in dheinenweis, Und wer es sache daz unsers herren kunig Wenczlawes zu Beheim Bruder erben oder vettern, oder derselben erben und nachkomen, die nu sein od(er)
in kunftigen geczeit werden, unser herren markgraven zu Brandemburg, ir weren einer oder mere, uns von dem kunigreich und lande zu Beheim, dem kunige und andern seine(n)
Brudern vettern erben und erbes erben, die in zciten unser herren markgraven zu Brandemburg sein und werden, scheiden wolten, Oder ob sie die marken zu Brandemburg
ganczle, oder in ein teil, von dem lande der marken vergeben verkouffen verseczen verwechseln oder empfremden wolten, So sullen wir obgenant Ratlute Burger und Stat dem
oder denselben nichtes pflichtig oder verbonden sein, von huldungen wegen, noch sust in dheinenweis, Und den oder die fur unser herren nicht haben, alle die weil daz sie
von sulchen sachen nicht lassen, Sunder uns hulden an den kunige von Beheim, und ander seine Bruder vettern erben erbes erben und nachkomen die denne uns(er) herren
markgraven zu Brandemburg sein oder sein wurden, Und die sulche vorgenante scheidunge vorgebunge verkouffunge verseczunge verwechselunge, oder empfremdunge
nicht teten, Wer ouch sache daz die obgenant unser herren kunig Wenczlaw von Beheim, seine Bruder und ir erben, erbes erben und nachkomen kunige zu Beheim, und
markgraven zu Brandemburg der obgenant markgraff Johans von Merhern, seine erben und erbes erben alle abesturben dz got fur sei, So haben wir obgenanten
Ratlute und Burger zu Drawemburg fur uns unser erben und nachkomen Burger zu Drawemburg und fur dieselben stat ewichlich gelobt und gesworen, geloben und sweren von
rechten wissen, mit krafft dicz brives, in guten truwen on alles geverde, einem iglichem kunige zu Beheim, der denne in zciten wirdet und ist, daz wir den und mit ym seine erben und
nachkomen ewichlich, Und nymand anders vor markgraven zu Brandemburg, unser rechte naturliche erbherren, haben und halten sullen und wellen, Und uns von ym dem kunigriche
zu Beheim, seinen egenanten furstentumen herschafften und landen die darzu gehoren, nicht scheiden, noch scheiden lassen sullen noch wellen, in dheinenweis, on alles geverde,
Wann es ouch zu sulchen schulden kumpt, So sullen uns dieselben unser erbherren, unsere recht brive und freiheit bestetigen, als ir vorfarn markgraven zu Brandemburg
getan haben, Und des zu ewigem urkunde, und ganczer sicherheit haben wir unser egenanten stat Insigel an disen brieff lassen hengen, Der geben ist zu Drawemburg
Nach cristus geburt drewzehnhundert Jare, dornach in dem vier und sibenczigstem Jare, an dem heiligen pfingestage.