Wir Ratlewte vnd burgere gemeinlichen der Stat zu Ebirswolde bekennen fur vns alle vnse Erbin vnd Nachkomen Burgere zu Ebirswolde vnd fur dieselbe Stat ewichlichen vnd tunkunt offenlichen
mit diesim briue allen den die yn sehent oder horent lezen Wanne wir furmals gesworen vnd erblichen gehuldit haben vnse lieben gnedigen herren keis(er) karls Sone(n) kunige Wenczlaw von
Beheim vnd seinen Brudern vnd ir allir Erbin vnd Erbis Erbin als markgrauen zu Brandemburg vnsern rechten Erbhern vnd ab die alle nicht weren Markgrauen Johansen von Merhern des
egenan(ten) vnse(r)s h(er)ren des keis(er)s Bruder seinen Erbin vnd Erbis Erbin als das in andern vnsern briuen die wir yn doruber geben haben vollenkomenlicher ist begriffen vnd wanne auch nu
der egenan(te) vnse(r) herre der keis(er) sunderlichen betrachtit hat wie er die Marke zu Brandemburg mit iren landen Steten vnd lewten die furmals lange zeit mit manigueldigem kriege vor=
cerbet vnd beschedigt ist in ewigen fride vnd schutz seczen muge vnd vns zu sunderlichen gnaden gegunt hat vnd gunt daz wir vnd die egenan(te) Marke zu Brandemburg von dem kunig=
reiche vnd lande zu Beheim der Markgraueschafft zu lusicz den Herczogtumen zu Bresslow zu der Sweidnitz vnd zu dem Jawer die zu dem kunigreiche vnd der Cronen zu Beheim ge=
horen vnd dasselbe kunigreich bynander von vns vnd der Marken ewigen Schutz hilffe vnd rat haben mugen vnd auch daz wir vnd die Marke zu Brandemburg vns zu demselbin
kunigreiche vnd lande zu Beheim in ewige eynunge hasse vnd fride seczen mugen douon zu eren vnd dienste dem heiligen Romischen Reiche durch ewigen friden besserungen vnd nuczes
willen vns(er)s vnd der Marken zu Brandemburg die wir in diesin sachen kentlichin erkant haben vnd engentlichen erkennen So haben wir mit wolbedachtem mute gutem Rate vnd von vns(er)s
rechten wissen fur vns vnse Erbin vnd Nachkomen ewichlichen vnd die egenan(te) Stat zu Ebirswolde mit willen vnd volbort des egenan(ten) vns(er)s h(er)ren des keis(er)s als eines obirsten lehen=
herren der egenan(ten) Marken zu Brandemburg dem vorgenan(ten) vnsim h(er)ren kunig Wenczlaw allen seinen Brudern vnd ir allir Erbin Erbis Erbin vnd Nachkomen die nu sein vnd hernach geboren
werden kunige zu Beheim vnd ab die nicht weren dem obgenan(ten) Markgrauen Johansen von Merhern allen seinen Erbin vnd Erbis Erbin als Markgrauen zu Brandemburg vnsern rechten Erb=
herren gelobt vnd gesworen geloben vnd sweren in guten trewen on allis geuerde daz wir ewichlichen bey dem kunigreiche vnd lande zu Beheim bleiben wollen vnd sullen vnd wir sullen
vnd wollen vns douon nymmer scheiden oder scheiden lassen durch dheinerleye sache oder sachen willen in dheinerleie wis Were is sache das vns(er)s h(er)ren kunig Wenczlaws zu Beheim
Brudir erbin oder vettern oder derselbin Erbin vnd Nachkomen die nu sein oder in kunfftigin zeiten werden vnse h(er)ren Markgrauen zu Brandemburg ir weren eyner oder mer vnd
von dem kunigreiche vnd lande zu Beheim den kunige vnd andern seinen Brudern vettern Erbin vnd Erbis Erbin die in zeiten vnse herren Markgrauen zu Brandemburg sein vnd werdin schei=
den wolten oder ab sie die Marken zu Brandemburg zumale oder ir ein teil von dem lande der Marken vorczehin vorkauffen vorseczen vorwexseln oder empfremden wolten So sullen vor=
obgenan(te) Ratlewte Burger vnd Stat dem oder denselbin nichtes pflichtig oder vorbunden sein von huldungen wegen noch sust in dheinerleis wis vnd den oder die fur vnse h(er)ren nicht
haben alle die weile daz sie nicht von sulichen sachen lassen Sunder vns halden an den kunig von Beheim vnd an andre seine Brudre vettern Erbin Erbis Erbin vnd Nachkomen die
denne vnse h(er)ren Markgrauen zu Brandemburg sein oder sein werden vnd die suliche vorczeihung scheidungen vorseczungen vorkauffungen vorwexselungen oder empfremdungen
nicht teten Were auch sache daz die obgenan(ten) vnse h(er)ren kunig Wenczlaw von Beheim seine Brudre vnd ir allir Erbin Erbis Erbin vnd Nachkomen kunige zu Beheim vnd Markgrauen zu
Brandemburg der obgenan(te) Markgraue Johans von Merhern seine Erbin vnd Erbis Erbin alle abesturbin do got fur sey So haben wir obgenan(te) Ratlewte vnd Burgere zu Ebirswolde fur
vns vnse Erbin vnd Nachkomen Burgere zu Ebirswolde vnd fur dieselbe Stat ewichlichen gelobt vnd gesworen geloben vnd sweren von rechter wissen mit krafft diz briues in guten
trewen ane alles geuerde eynem iglichen kunige zu Beheim der denne in zeiten wirdet vnd ist daz wir den vnd mit ym seine Erbin vnd Nachkomen ewichlichen vnd nyemand and(er)s
fur Markgrauen zu Brandemburg vnse rechten naturlichen Erbhern haben vnd halden sullen vnd wollen vnd vns von ym dem kunigreiche zu Beheim seinen egenan(ten) furstentumen Her=
reschefften vnd landen die dorzu gehorin nicht scheiden noch scheiden lassen sullen noch wollen in dheinerleis on allis geuerde Wanne is auch zu sulichen schulden kumpt So sullen vns
dieselbin vnse Erbherren vnse Rechte briue vnd freiheit bestetigen als ir vorfaren Markgrauen zu Brandemburg getan haben vnd des zu ewigem orkund vnd ganczir Siche(r)heit haben
wir vns(er)s egenan(ten) Stat Jngesigel an diesin brieff lassen hangen der gebin ist zu Ebirswolde Nach Cristes geburte Dreuczehenhundirt Jar dornach in dem Vier vnd sibenczigisten Jare an dem
heiligen pfingest tage