Wir Ratleute vnd burgere gemeynlichen der Stat zu perlberg bekennen fur vns alle vnsere erben vnd nachkomen burgere zu perlberg vnd fur dieselben Stat ewiclichen vnd
tun kunt offenlichen mit disem briefe allen den die yn sehen oder horen lesen Wenn wir wemals gesworen vnd erplichen gehuldet haben vnsers lieben gnedigen herren keyser karls
Soney kunig Wenczlawen von Beheym vnd seynen Brudern vnd ir aller erben vnd erbeferben als marggrauen zu Brandemburg vnsern rechten erpherren vnd ob die alle nicht we=
ren marggrauen Johansen von merhern des egenanten vnsers hren des keysers Bruder seynen erben vnd erbeferben als das in andern vnsern briefen die wir ym daruber geben
haben vollenkomenlicher ist begriffen Vnd Wenne ouch nu der egenant vnser herre der keyser sunderlichen betracht hat wie er die marken zu Brandemburg mit iren landen Stet=
ten vnd leuten die wemals lange zeyte mit manigfaldigem krige vorterbt vnd beschediget ist in ewigen frid vnd phlicht seczen muge Vnd vns zu sunderlichen gnaden gegunt
hat vnd gyt das wir vnd die egenanten marken zu Brandemburg von dem kunigreyche vnd landen zu Beheym der marggraueschafft zu lusicz den herczogtumen zu Bresslaw
zu der Swydnicz vnd zu dem Jawer die zu dem kunigreyche vnd der Cronen zu Beheym gehoren vnd dasselbe kunigreych bynander von vns vnd der marken ewigen schucze
helffe vnd rate haben mugen vnd ouch das wir vnd die marken zu Brandemburg vns zu demselben kunigreyche vnd lande zu Beheym in ewige eynunge faste vnd fride seczen
mugen dauon zu eren vnd dienste dem heyligen Romischen Reyche vnd durch ewigen friden besserungen vnd nuczes willen vnser vnd der marken zu Brandemburg dye wir in di=
sen sachen kintlichen erkant haben vnd eygentlichen erkennen So haben wir mit wolbedachtem mute gutem worte vnd von vnsern rechten wissen fur vns vnsere erben vnd nach
komen ewiclichen vnd die egenante Stat zu perlberg mit willen vnd volbort des egenanten vnsers hren des keysers als eynes obersten lehenherren der egenanten marken zu
Brandemburg den vorgenanten vnserm herren kunig Wenczlaw allen seynen Brudern vnd ir aller erben erbeferben vnd nachkomen die nu seyn vnd hernach geboren werden ku=
nigen zu Beheym Vnd ob dye (nicht weren dem obgenanten marggrauen Johansen von merhern allen seynen erben vnd erbeferben als marggrauen zu Brandemburg vnsern
rechten Erpherren gelobt vnd gesworen Geloben vnd sweren in guten trewen ane alles geverde das wir ewiclichen by dem kunigreyche vnd landen zu Beheym bleyben wol=
len vnd sullen Vnd wir sullen vnd wollen vns dauon nymmer scheyden oder scheyden lassen durch deheynerley sachen oder sachen willen in dheyneweys Vnd wer es sache
das vnsers herren kunig Wenczlaws von Beheym Brudre erben oder vettern oder derselben erben oder nachkomen dye nu seyn oder in kunftigen zeyten werden vnsere hren
marggrauen zu Brandemburg ir eynen eyner oder mer vns von dem kunigreyche vnd landen zu Beheym den kunige vnd andern seynen Brudern vettern erben vnd erbeferben die
in zeyten vnsere herren marggrauen zu Brandemburg seyn vnd werden scheyden wolten oder ob sie die marken zu Brandemburg zumale oder in eyn teyl von dem lande der mar=
ken vorseczen vorkeuffen vorsaczen vorwechseln oder empfremden wolten So sullen wir obgenanten Ratleute Burgere vnd Stat den oder denselben nichtes phlichtig oder vrbundig
seyn von huldungen wegen noch sust in dheyneweys Vnd den oder dye fur vnsere hren nicht haben alle dye weyle das sie nicht von sulchen sachen lassen Sunder vns halden
an den kunige zu Beheym vnd an andre seyne Brudre vettern erben erbeferben vnd nachkomen die denne vnsere hren marggrauen zu Brandemburg seyn oder seyn werden
Vnd die sulchen vorgenanten scheydungen vorseczungen vorkauffungen vorsaczungen vorwechselungen oder empfremdungen nicht tetten Wer ouch sache das die obgenan=
ten vnsere herren kunig Wenczlaw von Beheym seyne Bruder vnd ir aller erben erbeferben vnd nachkomen kunige zu Beheym vnd marggrauen zu Brandemburg der obgenant
marggraff Johans von merhern seyne erben vnd erbeferben alle obsturben da got fur sey So haben wir obgenanten Ratleute vnd Burgere zu perlberg fur vns vnsere erben
vnd nachkomen Burgere zu perlberg vnd fur dieselben Stat ewiclichen gelobt vnd gesworen Geloben vnd sweren von rechter wissen mit kraffte des briefes in guten tre=
wen ane alles geverde eynem yglichen kunige zu Beheym der denne in zeyten wirdet Vnd ist das wir den vnd mit ym seyne erben vnd nachkomen ewiclichen vnd nymant
anders fur marggrauen von Brandemburg vnsere rechten naturliche erpherren haben vnd halden sullen vnd wollen Vnd vns von ym dem kunigreyche zu Beheym seynen ege=
nanten furstentumen herrschefften vnd landen die darzu gehoren nicht scheyden noch scheyden lassen sullen noch wollen in dheyneweys ane alles geverde Wenne es ouch
zu sulchen schulden kumpt So sullen vns dieselben vnsere erpherren vnsere rechte briefe vnd friheite bestetigen als ir vorfaren marggrauen zu Brandemburg getun
haben Vnd des zu ewigem vrkund vnd ganczer sicherheyt haben wir vnser gnantey Stat Jngesigel an diesen brieff lassen hengen der geben ist zu perlberg nach
Crystes geburt Dreyczenhundert Jar darnach in dem Vierundsibenczigsten Jare an dem heyligen pfingsten tage